Në Gjykatën Themelore në Tetovë sot është mbajtur gjykimi për fjalët përmbyllëse të Prokurorisë dhe mbrojtjes së të pandehurve të cilët ngarkohen për disa vepra penale lidhur me zjarrin në spitalin modular në shtator të vitit 2021 ku jetën humbën 14 persona. Pas thuajse një orë e gjysmë shpjegim, gjyqtari Jordan Velkovski theksoi se seanca kryesore ka përfunduar dhe se aktvendimin do ta bëjë të ditur të hënën më 5 qershor në orën 12.
Përfaqësuesi i Prokurorisë theksoi se me provat dhe dëshmitë e paraqitura të akuzuarit kanë kryer veprat penale dhe kërkoi nga gjykata që t’i shpall fajtorë. Sipas Prokurorisë, dy drejtorët e akuzuar kanë pasur për detyrë të vendosin aparate kundër zjarreve dhe këtë nuk e kanë përmbushur. Për të akuzuarin mjekun Boban Vuçevski, prokurori ka locuar në dëshmitë e familjarëve dhe ka thënë se ka lejuar praninë e familjarëve të pacientëve.
Fjalëve përmbyllëse të Prokurorisë iu bashkuan edhe pesë avokatë të cilët kanë pasur autorizim për të përfaqësuar familjet e personave që kanë humbur jetën nga zjarri dhe pacientët e lënduar në spitalin modular. Ata në emër të tyre kërkuan nga gjykata që t’i udhëzojë për kompensimin e dëmeve dhe shpenzimeve.
Avokati i subjektit juridik Institucioni shëndetësor publik, Spitali klinik Tetovë ka theksuar se për dy veprat për të cilat ngarkohet spitali me anë të dëshmive vërtetohet e kundërta. Ai solli dëshmitë e punonjësve të ISHP-së Spitalit Klinik Tetovë të cilët theksuan se aty janë instaluar aparate kundër zjarreve dhe se institucioni ka pasur udhëzime dhe rregullore rreth rregullave gjatë kohës së pandemisë.
Avokati i të akuzuarit, Florin Besimi në fjalët përmbyllëse ka locuar në dëshmitë e punonjësve të spitalit të cilët kanë theksuar se ka pasur mjete për fikjen e zjarrit. Sipas tij, në anën tjetër i pandehuri nuk ka qenë i autorizuar dhe nuk ka pasur obligim për vendosjen e pajisjeve kundër zjarreve dhe nuk ka marrë pjesë në pranim- dorëzimin e spitalit modular.
Edhe avokati i të akuzuarit Artan Etemi ka kërkuar aktvendim lirues duke theksuar se të pandehurit nuk akuzohen për shkaktimin e zjarrit, por për një vepër krejtësisht tjetër të kryer nga pakujdesia. Sipas avokatit është jo karakteristike të përcaktohet një diapazon i gjerë kohor i kryerjes së një vepre edhe pse pyetjet e bëra drejt dëshmitarëve kanë qenë ekskluzivisht për ditën e 8.9.2021 kur ka ndodhur zjarri.
Mbrojtësi i të akuzuarit, mjekut Boban Vuçevski tha se i bashkohet fjalëve përmbyllëse të avokatëve të mëparshëm duke theksuar se Prokuroria nuk ka dëshmuar vepër penale të kryer jashtë mendjes së shëndoshë nga klienti i tij. Edhe për Vuçevskin kërkoi aktvendim lirues. Sot sërish para gjykatës një grup qytetarësh para fillimit të seancës përmes një proteste paqësore kërkuan lirimin e mjekut.
Të gjithë të akuzuarit u pajtuan me fjalët përmbyllëse të avokatëve të tyre.
Ish drejtorët Florin Besimi dhe Artan Etemi ngarkohen për veprën penale “vepra të rënda kundër sigurisë së përgjithshme”, ndërsa mjeku Boban Vuçevski për “mosrespektim të rregullave shëndetësore gjatë kohës së epidemisë”.
Spitali klinik si subjekt juridik ngarkohet për dy vepra penale – “shkaktimin e rrezikut publik” dhe “mosveprim të rregullave shëndetësore gjatë epidemisë”.
Në fillim të gjykimit ata theksuan se e kuptojnë akuzën, por se nuk ndihen fajtorë. Gjykimi filloi në dhjetor të vitit 2022.