Me 40 milionë euro do të punësohen 16 000 persona! Qeveria me plan operativ, synohet që papunësia të bjerë në 9%

Me 40 milionë euro këtë vit do të punësohen mbi 16.000 qytetarë – më së shumti të rinj deri në moshën 29 vjeç. Qeveria ka miratuar planin operativ për punësim. Kryeministri pret që papunësia të bjerë në 9 për qind.

“Me këtë plan përfshihen dy pika kryesore. E para është mbështetja direkte për biznese start-up për të rinjtë, që ishte edhe një premtim imi për të rinjtë. Pika e dytë është qasja e organizuar në luftimin e dukurisë së zjarreve, problem veçanërisht i pranishëm në periudhën verore, për të cilin do të punësohen 400 zjarrfikës që do të jenë në dispozicion të komunave, aty ku do të ketë nevojë, natyrisht, si dhe punësimi shtesë i 600 personave të papunë që do të angazhohen për punë publike dhe projekte komunale”, tha Mickoski.

Plani këtë vit peshon 7.5 milionë euro më shumë se vitin e kaluar. Ministri i Ekonomisë Besar Durmishi theksoi se për të gjitha masat kushti themelor është që të papunët të jenë të regjistruar në Qendrat për Punësim si kërkues aktivë të punës.

“Risi nga ky vit është masa për vetëpunësim të të rinjve të papunë deri në moshën 29 vjeç. Me ç’rast lartësia e mbështetjes financiare arrin në 10.000 euro mjete të pakthyeshme për hapjen e një biznesi. (…) Risi është gjithashtu edhe nënmasa për mbështetje të vetëpunësimit përmes bashkimit të përfituesve deri në dy persona për të themeluar një biznes. Me ç’rast lartësia e mbështetjes financiare varion nga 14.000 euro deri në 20.000 euro”, tha Besar Durmishi.

Drejtori i Agjencisë për Punësim u bëri thirrje të papunëve dhe punëdhënësve të aplikojnë për masat.

“Thirrjet e para publike do të publikohen shumë shpejt, ndërsa të tjerat do të publikohen me faza sipas një orari dhe plani të përcaktuar paraprakisht”, tha Selatin Beluli.

Plani parashikon edhe mbështetje për të rinjtë për praktikë, shtesa rinore prej 50 euro për të rinjtë deri në moshën 23 vjeç që do të punojnë në prodhim. Gjithashtu vazhdon edhe masa për mbështetje të punëdhënësve, që për punësimin e të rinjve të papunë deri në moshën 29 vjeç, të marrin deri në 250.000 denarë për person.