Marrëveshja kolektive askund në terren, sindikatat para-padi Ministrisë së Kulturës

Historike u cilësua miratimi i Marrëveshjes kolektive në kulturë. Marrëveshja që u nënshkrua mes ish ministrin e Kulturës, Hysni Ismaili, Sindikatës së Punëtorëve Kulturorë dhe Sindikatës së Arsimit, Shkencës dhe Kulturës edhe pas 7 muajsh nuk është duke u zbatuar në praktikë.

Nga Sindikata e Punëtorëve Kulturorë janë të revoltuar, sepse thonë se në takimin që e kanë pasur më 6 korrik me funksionarët e atëhershëm Oliver Spasovski, Milla Carovska dhe Hysni Ismaili të gjithë ishin dakord se Marrëveshja kolektive është në fuqi.

“Të gjithë ishin të mendimit se vlen Marrëveshja Kolektive. Dilema ishte se a duhet me pagën e qershorit apo të korrikut. Ku ne si sindikatë thamë është në rregull, le të jetë me të qershorit, sepse kishte hapësirë për interpretim dhe morëm garancën nga kryeministri teknik se pagesa do të bëhet me pagën e qershorit dhe e obligoi Ministrinë e Kulturës që të gjej mjete nëpërmjet ribalancit të buxhetit të Ministrisë së Financave dhe programit të investimeve kapitale”, tha Goce Pavllovski, Sekretar i SPK-së.

Sipas marrëveshjes, punëtorët kulturorë pagat me rritje duhej t’i kishin deri më 10 gusht dhe të njëjtat duhet të përllogariten vetëm me Marrëveshjen e re, sepse çdo marrëveshje tjetër në institucionet kulturore pezullohen me hyrjen në fuqi të kësaj marrëveshje. Për këtë, nga Sindikata kanë dorëzuar paralajmërim për padi deri te Ministria e Kulturës.

“Sipas marrëveshjes kolektive ne pagat duhej t’i kishim deri më 10 gusht, kurse 15 ditë Ministria po vonon. Sindikatat tashmë kanë dorëzuar vërejtje para padisë deri te Ministria e Kulturës për mosrepsektim të afatit edhe pse disa institucione tashmë kanë dorëzuar raportin nga sistematizimi dhe Marrëveshja kolektive është publikuar në Gazetën zyrtare. Kjo do të thotë se ne si sindikata po bëjmë presion që kjo të zgjidhet”, theksoi Sekretari i SPK-së, Goce Pavllovski.

Kohë më parë ministri i Kulturës ne ikje, Hysni Ismaili shprehu bindjen se marrëveshja kolektive do të fillojë të zbatohet nga 1 korriku, edhe pse Qeveria kishe kërkuar prolongimin e saj deri në fund të vitit.

 
“Ne do të mundohemi që ta rikthejmë ose jo prej korrikut, ndonjë muaj para ose prapa”, u shpreh Hysni Ismaili, ish-ministër i Kulturës.

Por të njëjtin premtim po e thonë edhe sot nga dikasteri që e udhëhiqte ai.  Nga Ministria e Kulturës prolongimin e pagave e arsyetojnë me krizën e shkaktuar nga Kovid-19 dhe nga mosdorëzimin e planit të sistematizimit nga ana e institucioneve kulturore.

“Jemi informuar se një pjesë e institucioneve, edhe pse ka kaluar afati i paraparë (16.03.2020) ende nuk kanë dorëzuar vendimet dhe marrëveshjet për sistematizim, të parapara me Marrëveshjen kolektive, në pjesën e koeficientit të pagës, për shkak të së cilës tashmë vonon pagesa e rrogave në institucionet e kulturës, për muajin korrik”, thonë nga Ministria e Kulturës.

Thonë se e kuptojnë shqetësimin e punëtorëve kulturorë dhe premtojnë se do ta zgjidhin problemin, por pa precizuar afat për këtë. Përndryshe, marrëveshja kolektive parasheh nivelizim të pagave mes punëtorëve kulturore dhe u arrit pas 15 vjetësh, pas negociatave dhe protestave disa mujore nga sindikatat kulturore.