Kryetari i opozitares VMRO-DPMNE, Hristijan Mickoski, thotë se sipas tij është e papranueshme marrëveshja e re e gjithëpërfshirëse që duhet ta nënshkruajnë Shkupi dhe Sofja dhe që pritet të bëhet pjesë e kornizës negociuese. Garancitë që i kërkon Bullgaria në këtë proces duhet në mënyrë reciproke të vendosen edhe nga ana jonë, shton Mickoski i cili dyshon se në prapaskenë janë kërkesa shumë më të mëdha se vendosja e pakicës bullgare brenda Kushtetutës. Ai apelon për kujdes.
“Nëse e nënshkruan dhe nëse e pranon dhe bëhet pjesë e procesit negociues, nuk ka më kthim. Atëherë ose do të bullgarizohemi ose do të bëhemi pjesë e BE-së, ose do të negociojmë pa fund. Prandaj është shumë e rëndësishme që sot VMRO-DPMNE-ja të sigurojë përkrahje shoqërore nga populli maqedonas dhe qytetarët e Maqedonisë që së bashku të dalim për ta penguar zaevizmin i cili zbatohet përmes Kovaçevskit që ta pranojë këtë zgjidhje dhe e njëjta të futet në kornizën negociuese“, tha Hristijan Mickoski, lider i VMRO-DPMNE-së.
Çështja e futjes së pakicës bullgare në Kushtetutë sipas akademikut Vllado Kambovski nuk ka asgjë kontestuese. Siç theksoi ai, kjo varet nga vetë ne.
“Të gjitha këto çështjet në lidhje me pozitën e komuniteteve etnike, grupeve etj, janë çështje e çdo shteti. Ndonjë shtet mund të sugjerojë diçka, megjithatë çështja varet prej nesh, nga vendimi ynë, ne kemi mekanizma në lidhje me atë se si zbatohet iniciativa për ndryshimet e Kushtetutës, ky do të jetë vendimi ynë. Nuk e vlerësoj si përzierje për shkak se askush nuk mund të përzihet në të dhe t’ju tregojë se çfarë të bëni, këtë e bëni ose nuk e bëni vetë ju“, pohoi Vllado Kambovski, akademik.
Këto ditë ministri i jashtëm Bujar Osmani njoftoi se ka propozim për dokument të ri i cili do të jetë një marrëveshje e gjithëpërfshirëse mes Bullgarisë dhe Maqedonisë e cila duhet të bëhet pjesë e kornizës negociuese, por nuk deshi të zbulojë detaje prej kësaj marrëveshjeje. Kryeministri Dimitar Kovaçevski gjatë periudhës së kaluar përsëriti disa herë se për identitetin maqedonas nuk do të negociohet.