Mariçiqi me dy standarde për “përzierje në gjyqësor”, për rastin “Alfa” nuk ndërhyn, për Mijallkovin kërkonte përgjegjësi

Kanë kaluar 8 muaj që kur avokati në rastin “Alfa” dërgoi ekspertizë të re ligjore deri te Gjykata Penale.
Ekspertiza thotë se të dënuarit me burg të përjetshëm, nuk janë kryerësit e veprës vrasje. Mbi këtë bazë, pala mbrojtëse kërkon rigjykim të rastit. Po ndonëse ka kaluar mbi gjysmë viti, ende nuk ka vendim. Gjykata e Apelit dhe Penalja hedhin topin tek njëra-tjetrën për zvarritje të lëndës.

E politika nuk mund të ndërhyjë në punën e tyre për të përshpejtuar vendimin. Këtë se bën dot as Ministri i Drejtësisë, Bojan Mariçiq, duke thënë se s’mund të përzihet në gjyqësor, ndonëse ditë më parë kërkonte llogari nga gjykatësit që vendosën për lirimin e Sasho Mijallkovit nga paraburgimi.

“Nuk e ndjek rastin në detaje. Por nëse më pyesni për përsëritje eventuale të procedurës ose jo, për këtë gjithsesi vendos gjykata. Ne në këtë pjesë nuk mund të përzihemi. Ky është vlerësim dhe vendim i gjykatës në përputhje me faktet e dorëzuara, ose nëse janë dorëzuar fakte të reja për këtë rast”, tha Mariçiq.

TV21 komunikoi edhe me palën mbrojtëse në rastin “Alfta” të cilët vetëm na thanë se zhvillime për rastin presin nga java e ardhshme. Gjykata u ka kërkuar që ekspertiza e bërë të dërgohet për vlerësim në Byronë për ekspertizë, veprim ky i cili nuk ka ndodhur deri tani. Familjarët nuk e kanë të qartë si mund ta vlerësojë ekspertizën një byro e cila paraprakisht ishte prononcuar se nuk posedon resurse materiale dhe njerëzore për të realizuar një ekspertizë të video-materialit.

“Kemi bërë ekspertizë jashtë shtetit për shkak se Byroja jonë për ekspertizë nuk i plotëson kushtet. Tash thotë që atë ekspertizë duhet që Byroja jonë ta verifikon. Për çfarë arsye, nëse nuk kemi mjete për zbardhje të asaj video dhe na keni dërguar në shtet tjetër, cila është arsyeja që Byroja për ekspertizë ta verifikon, kur ne nuk kemi mjete dhe njerëz adekuat për atë ekspertizë”, tha Ramiz Dauti, familjar.

Rasti Alfa ka ndodhur më 26 nëntor 2008, në parkingun e Fakultetit matematiko-natyror në Shkup, nga ku jetën kishte humbur polici shqiptar nga njësiti Alfa, ndërsa ishin plagosur edhe dy kolegët e tij maqedonas me të cilët ai kishte qenë në patrullë. Në prill të vitit 2010, për këtë vrasje me burgim të përjetshëm u dënua Rexhail Qerimi dhe Agim Islami.