Kryeministri grek Kirijakos Micotakis drejtpërdrejtë akuzoi presidentet Gordana Siljanovska-Davkova dhe kryeministrin Hristijan Mickoski, për shkeljen e Marrëveshjes së Prespës. Micotakis e ngriti temën në Samitin e Këshillit Europian, duke theksuar se të gjitha veprimet kanë edhe pasojat e tyre. Kryeministri grek theksoi se nuk ka anëtarësim në BE pa respektimin e marrëveshjeve të nënshkruara.
“I informoj kolegët e mi në Këshillin Europian për ngjarjet në Maqedoninë e Veriut, për faktin që edhe presidentja edhe mandatari për kryeministër, në fakt drejtpërdrejtë e shkelin Marrëveshjen e Prespës, duke injoruar në praktikë “erga omnes” dhe kanë zgjedhur që të shfrytëzojnë emër tjetër, e jo emrin e definuar me kushtetutë, për përdorim të brendshëm, që është plotësisht në kundërshtim me frymën e Marrëveshjes së Prespës”, tha Kirijakos Micotakis, kryeministër i Greqisë.
Paraprakisht edhe kryeministri i Bullgarisë, Dimitar Gllavçev tha se do të flasë për Maqedoninë para kolegëve europianë. Ai theksoi se do të kërkojë që BE të konfirmojë se do të qëndrojë prapa asaj që është dakorduar me propozimin francez duke i përfshirë edhe ndryshimet kushtetuese. Sipas tij, duke gjykuar nga deklaratat e, siç tha, funksionarëve në Republikën e Maqedonisë së Veriut, ata nuk do t’i zbatojnë ndryshimet. Kryeministri i Bullgarisë insistoi që qëndrimet e tij të jenë pjesë e konkluzioneve zyrtare të Samitit. Megjithatë, pjesë të veçantë brenda konkluzioneve për Maqedoninë nuk ka, ndërsa Këshilli dërgoi mesazh të përbashkët deri te të gjitha vendet kandidate që kanë probleme dypalëshe.
“Bashkimi Europian do t’i përkrahë vendet kandidate për plotësimin e kritereve për aderim përmes instrumenteve adekuate dhe do t’i shfrytëzojë të gjitha mundësitë për avancimin e mëtutjeshëm të integrimit gradual. Po ashtu do t’i nxisë përpjekjet për reforma sidomos në pjesën e sundimit të së drejtës, integrimit rajonal, marrëdhënieve të mira ndërfqinjësore, pajtimit dhe zgjidhjes së kontesteve dypalëshe”, thonë nga Këshilli Europian.
Në lidhje me retorikën e ashpërsuar me Sofje, së fundmi kryeministri Mickoski paralajmëroi se duhet ulur në tryezë dhe të kërkohet zgjidhje e përbashkët që do të bazohet në argumente. Sa u përket relacioneve të përkeqësuar me Athinën, shefi i diplomacisë, Timço Mucunski, para se ta marrë këtë funksion, gjithashtu tha se duhet ulur në tryezë për shkak se të dyja palët kanë moskuptime në lidhje me leximin e Marrëveshjes së Prespës.