“Nëse është e nevojshme do t’ua dërgojmë regjimentin inxhinierik për t’i hequr të gjitha përmendoret të cilat nuk kanë të bëjnë me faktet historike”, deklaroi Krasimir Karakaçanov – Ministër i Mbrojtjes së Bullgarisë.
Kjo deklaratë e Ministrit bullgar të mbrojtjes është si pasojë se fqinji lindor gjendet në periudhë parazgjedhore, andaj Maqedonia e Veriut nuk do të bëhet pjesë e diskursit të brendshëm bullgar, duke reaguar në rrugë zyrtare ose me notë proteste, pohon ministri për Punë të Jashtme Bujar Osmani.
“Unë mendoj që nuk duhet të jemi pjesë e diskursit të brendshëm politik parazgjedhor në Republikën e Bullgarisë. Intenca e këtyre deklaratave është pikërisht kjo që pastaj reagimet tona të shfrytëzohen në kuadër të një ambienti të fushatës parazgjedhore në Bullgari. Nuk mendoj, kjo as na shërben neve as që i shërben raporteve ndërfqinjësore dhe asaj që duhet të arrijmë bashkë ndërmjet dy vendeve”, tha Bujar Osmani – Ministër i Punëve të Jashtme.
Zëvendëskryeministri i parë, Artan Grubi thotë se deklarata të tilla i takojnë shekullit të kaluar dhe nuk kanë vend në shekullin e integrimit.
“Në veçanti të BE-së dhe në vlerat të cilat i kultivon BE-ja, shpresoj që çështjet midis dy vendeve tona të mos bëhen subjekt i fushatës zgjedhore në vendin tonë fqinj, por në frymën e fqinjësisë së mirë ti tejkalojmë të gjitha dallimet dhe të hapim negociatat në dhjetor me përkrahjen edhe të bullgarisë”, potencoi Artan Grubi – Zëvendëskryeministër i parë.
VMRO-DPMNE kërkon që për deklarata të këtilla të reagojë qeveria, përmes ministrisë për punë të jashtme.
“Nga atje deri më tani për asnjë çështje të këtillë të rëndësishme nuk kemi dëgjuar përgjigje ose ndonjë notë proteste, pres që të deklarohen në mbrojtje të identitetit maqedonas, shtetin dhe qytetarët e Maqedonisë së Veriut”, theksoi Nikolla Micevski nga VMRO-DPMNE.
TV21 kërkoi qëndrim edhe nga NATO, për deklaratën e ministrit të Bullgarisë, që është vend anëtar i Aleancës Veriatlantike, por deri në këto momente pa përgjigje.
Deklarata e Ministrit Karakaçanov vjen pas pohimet të vazhdueshme të disa zyrtarëve bullgarë, se nuk do të ketë hapje të negociatave mes Shkupit dhe Brukselit, pa u zgjidhur disa nga çështjet për gjuhën dhe historinë mes Maqedonisë së Veriut dhe Bullgarisë, për këtë madje paralajmërohet veto bullgare në BE.