Në një postim të ndarë në rrjetin e tij social Facebook, Ministri i Shëndetësisë Venko Filipçe ka shkruar se Maqedonia e Veriut është vendi i dytë në rajon për sa i përket numrit të testeve të koronavirusit të kryera për 1 milion banorë.
“Ne kemi teste të mjaftueshme për të përmbushur nevojat e vendit tonë. Ky është një rezultat i shkëlqyeshëm, jo vetëm për numrin e testeve, por edhe për qasjen e përgjithshme për të identifikuar pacientët, rezultatet e tyre dhe grupimet e pacientëve. Aktualisht kemi 4500 teste dhe rezervat plotësohen çdo ditë. Ne presim dhurimin e 20,000 kompleteve për teste – gjë që është e mjaftueshme për nevojat sipas popullsisë totale në vend” ka shkruar Filipçe në Facebook, përcjell TV21.
Jo më larg se dje, kreu i opozitares VMRO-DPMNE Hristijan Mickoski deklaroi se sipas informacioneve që ai i ka, Ministria e Shëndetësisë ka vetëm 100 teste për COVID-19,
“Unë kam informacion se nuk ka më shumë se 100 teste në dispozicion për koronavirusin. Nëse me të vërtetë kanë 350 teste në dispozicion, kjo është katastrofë” tha Mickoski më 3 prill.
Për këto pohime të kreut opozitar po dje reagoi edhe Ministri Filipçe duke shkruar se “çuditet se me çfarë lehtësie gënjen Hristijan Mickoski se paska teste për vetëm edhe një ditë”./TV21