Maksuti: Deputetët e infektuar mbrojtën qytetarët! Kallajxhiev dhe Tortesvki kërkojnë dënim dhe dorëheqje

Reagime të ashpra nxiti në opinion ardhja e dy deputetëve të infektuar me koronavirus në Kuvend. Ishte ose jo ligjore ardhja e tyre dhe a kryen deputetët vepër penale me shkeljen e masës për izolim shtëpiak?

Juristët me qëndrime të ndryshme. Gordan Kallajxhiev dhe Aleksander Tortevski thonë se  deputetët kanë shkelur ligjin dhe duhet të dënohen gjegjësisht të japin dorëheqje.

 “Deputetët që kanë marrë pjesë kanë shkelur masën për izolim. Vetëm a ju kujtohet, si e sulmuan Maksim Dimitrievski, kryetar i Komunës së Kumanovës, kur doli nga izolimi vetëm që të testohet në Shkup”, tha Gordan Kallajxhiev – jurist.

 “Bisera do të ishte hero në qoftë se jep dorëheqje nga parlamenti dhe në vend të saj do të vinte një deputet tjetër. Kështu patetik, heroizëm dhe sakrificë”, potencoi Aleksander Tortevski – jurist.

Por juristi Mersim Maksuti, vlerëson se gjithë kjo është një debat i kot që nuk ia vlen. Maksuti thotë se mbi të gjitha në këtë rast sundon interesi i qytetarëve.

 “Kjo nuk është një çështje kaq e thjeshtë për të gjykuar se a kanë bërë vepër penale ose jo. Në fund të fundit ata kanë  mbrojtur interesin publik dhe gjithmonë në mbrojtje të interesit publik mund të shkelen normat ligjore. Interesi i përgjithshëm e mund normën ligjore në rastin konkret”, theksoi Mersim Maksuti – jurist.

Pyetëm në Prokurori, se a do të  ngritët padi penale për dy deputetët. Nga atje shkurt na thanë se do të veprojnë në bazë të kompetencave të tyre.

 “Deri në këtë moment deri në Prokurorinë Publike Themelore nuk ka arritur asnjë padi penale për ngjarjen për të cilën tregoni interes. Prokuroria i ndjek të gjitha informacionet dhe do të veprojë në bazë të kompetencave të veta”, thonë nga Prokuroria Publike Themelore.

Pyetëm edhe deri në MPB, por deri në këto momente pa përgjigje. Nga Kuvendi thonë se ardhja e tyre ka qenë me leje paraprake të Komsionit për Sëmundje Ngjitëse dhe me protokoll, por në Protokollin nuk është e paraparë që deputet pozitiv me koronavirus të mund të marrin pjesë në seance. Ndërkohë që nga fillimi i pandemisë qindra qytetarë janë gjobitur me nga 2000 euro nga Prokuroria për mos respektim të masës për izolim shtëpiak.