Krimi nuk ka baza etnike. Kështu deklaroi Hristijan Mickoski duke iu referuar akuzave të BDI-së të cilët thonë se antishqiptarizmi në VMRO nën udhëheqësinë e tij ka tejkaluar edhe atë të Nikolla Gruevskit.
“Të merret me krim dhe kur ky krim zbulohet atëherë i akuzojnë qytetarët se janë antishqiptarë e kështu me radhë. Ata që merren me krim politik janë edhe antishqiptarë, edhe antimaqedonas dhe antiqytetarë dhe kjo është gjë e keqe sepse po e shikoni që në të gjitha matjet, sidomos krimi politik është në nivelin më të lartë. Unë jam shumë serioz kur them se shumë shpejt nga sot shumë seriozisht do të lëshohemi në luftë me krimin dhe korrupsionin sidomos krimin e politikanëve”, tha Hristijan Mickoski – Kryetar i VMRO-DPMNE-së.
Mickoski shtoi se nuk do të zmbrapsen në luftën kundër krimit dhe korrupsionit, ndërsa shtoi se BDI dhe LSDM po mbrojnë politikanët e inkriminuar dhe të korruptuar. Megjithatë për BDI-në Mickoski është kundër shqiptarëve, ndërsa akuzojnë se ai po ua ndalon kryetarëve të tij të komunave të bashkëpunojnë me shqiptarë.
“A u ka dhënë urdhër të qartë, të rreptë dhe të prerë kryetarëve të tij të komunave që të mos bashkëpunojnë me shqiptarë, të mos lëshojnë leje ndërtimi për kompanitë në pronësi të shqiptarëve dhe të mos legalizohen shtëpitë e shqiptarëve edhe pse i përmbushin kushtet ligjore. Shqetësimi ynë më i madh është akoma antishqiptarizmi në VMRO DPMNE, që lidershipi i mëparshëm i VMRO-së e tejkaloi, por Mickoski e riktheu në derë të madhe, me protestat kundër gjuhës shqipe, kundër shqiptarit kryetar të Kuvendit, me 27 prillin, me nxitjen e mostolerancës ndëretnike dhe me gënjeshtrat e tij të përditshme kundër shqiptarëve në pozita të larta”, thonë nga BDI.
Edhe pse Mickoski me tone optimiste premton se së shpejti në Qeveri do të vijë VMRO, nga BDI thonë se ai vetëm po turpërohet sepse nuk ka as 61 deputetë.