Pas një debati të gjatë, social demokratët zgjodhën udhëheqësinë e partisë.
Nënkryetarë:
-Pero Konstadinov
-Stefan Bogoev
-Fatmir Bytyqi
-Bisera Kostadinova Stojçevska
SEKRETARË I PËRGJITHSHËM:
-Mile Zeçeviq
Katër nënkryetarët dhe sekretari i përgjithshëm do të kenë për detyrë që në periudhën e ardhshme të bashkojnë partinë. Anëtarë të ri ka edhe në Bordin ekzekutiv.
“Gjatë zgjedhjes së anëtarëve të ri të Bordit ekzekutiv dhe nënkryetarëve të ri, jam udhëhequr sipas parimit që në ekip të kemi njerëz me përvojë, të njohur për angazhimin e tyre në LSDM, por edhe njerëz të rinj të cilët në këtë periudhë kanë fituar renome dhe përvojë për kryerjen e obligimeve të tilla. Dëshiroj që tua prezantoj personat të cilët në periudhën e ardhshme së bashku me mua do të punojnë krah më krah për të bashkuar anëtarësinë, për të përforcuar organizatën partiake dhe të kthehemi në rrugët fitimtare”, tha Dimitar Kovaçevski, lider i LSDM.
Zv.kryetarja e partisë, Sanja Llukarevska, e vazhdoi mandatin e vet, ndërsa funksion të ri në LSDM mori edhe ministri i drejtësisë, Bojan Mariçiq, i cili do të jetë i obliguar për bashkëpunim ndërkombëtarë. Përveç tij, treshen e sekretarëve të ri të partisë e rrumbullakon edhe Vangell Andreski, i cili është emëruar sekretar organizativ.
Siç publikoi dje TV21, Kovaçevski personat e ri para bashkë-partiakëve i prezantoi si persona që nuk vijnë në funksion për tu realizuar, ndërsa u ankua se e gjithë udhëheqësia është në dorëheqje pas largimit të Zaevit, dhe se nuk ka kush ta mbroj nga sulmet e VMRO-DPMNE.
Reaguan nga VMRO-DPMNE, njerëz të njëjtë – vlera të njëjta, thonë nga partia e Mickoskit.
“Në LSDM asgjë nuk ndryshon. Njerëzit e njëjtë, vlerat e njëjta. Përmbajtja e personave në udhëheqësinë e LSDM është përmbajtje e personave që kanë bërë pakt me Zaevizmin, ndërsa kjo asgjë të mirë nuk do t’i sjell Maqedonisë. Shërbëtori Kovaçevski duhet që të distancohet nga krimi i Zaevit dhe të krijoj rast kundër Zaevëve për zhvatjen e madhe. Zaevët janë të përfshirë në krimet më të mëdha në Maqedoni“, pohoi Dragan Kovaçki, VMRO-DPMNE.
Nga LSDM paralajmëruan se partia do të reformohet dhe riorganizohet, si dhe theksuan se do të formohet Këshill për krijimin dhe zbatimin e politikave, i cili do të ketë për detyrë mbikëqyrjen e politikave të partisë, ndërsa me të do të udhëheq ish nënkryetari i LSDM, Igor Ivanovski.