LSDM kundër bashkimit të ASK dhe AK – Filipçe: Hristovski u emërua në mënyrë diktatoriale

Emërimi i drejtorit të ri të Agjencisë për siguri kombëtare u bë në mënyrë diktatoriale, akuzoi kryetari i LSDM-së, Venko Filipçe. Vendosjen e ish kryetarit të Komitetit të Qytetit të Shkupit të VMRO-DPMNE-së Bojan Hristovski në krye të Agjencisë, Filipçe e vlerësoi si rrëmbim partiak. Ai vlerëson se janë nënçmuar profesionalistë nga Agjencia dhe pret reagime nga partnerët ndërkombëtarë.

“Do t’i njoftojmë të gjithë partnerët tanë strategjikë dhe do të kërkojmë mendim dhe reagim prej tyre, por njëkohësisht e thërras presidenten Gordana Siljanovska Davkova të dalë me qëndrim të vet dhe ta pengojë bashkimin e paralajmëruar të ASK-së me Agjencinë për kundërzbulim, të mos heqë dorë nga kompetencat e saj”, tha Venko Filipçe.

Kundër përzgjedhjes së Hristovskit është edhe BDI. Prej atje thonë se me këtë agjenci duhet të udhëhiqet kuadro jopolitike dhe profesionale.

“Në shkurt të vitit 2023 ishte emëruar kryetar i komitetit të VMRO-DPMNE-së në Qytetin e Shkupit. Kjo përzgjedhje ka hapur shumë dilema ku me të drejtë mund edhe të dyshojmë se intenca është institucionet e sigurisë të kthehen në çerdhe partiake”, tha Valdet Xhaferi.

Bashkimi i ASK-së dhe AK-së është paralajmëruar për vitin e ardhshëm. Pikërisht me këtë reformë drejtori Hristovski në intervistë për Kod, e arsyetoi statusin e tij në Facebook në shtator të këtij viti kur ia uroi ditëlindjen e fundit të Agjencisë të cilën e udhëheq për momentin. Sipas opozitës, statusi i tillë ishte paralajmërim se Hristovski gjoja do ta shkatërronte ASK-në.

“Nëse ndodh kjo gjatë vitit të ardhshëm, sipas paralajmërimeve të kryeministrit, ASK formalisht nuk do të ekzistojë tashmë, kështu që nuk mund të festohet ditëlindja e ASK-së si institucion që nuk ekziston”, tha Bojan Hristovski.

Hristovski në intervistë nuk i komentoi akuzat e LSDM-së për certifikatën e tij për gjuhën angleze të cilën kinse e ka marrë në Plovdiv, Bullgari duke marrë parasysh se atje nuk ka qendra të licencuara për dhënien e certifikatës së tillë. Hristovski shtoi se pasi u emërua në këtë funksion, ka filluar procedurë për certifikatë të sigurisë të nivelit më të lartë – sekret shtetëror.