LSDM kërkon përgjegjësi për “krushqit në Bllacë”  – Mickoski e lavdëroi Gashin për punën në Kuvend

Ministri i Brendshëm Pançe Toshkovski i bën kurth shefit të turnit në pikën kufitare Bllacë, akuzon LSDM. Kjo vjen pasi Toshkovski, për lëshimet në pikën kufitare me procesionin e kryeparlamentarit Gashi, paralajmëroi se do të kërkojë përgjegjësi nga shefi i turnit. Sipas LSDM-së, ai nuk është kryerësi i skandalit, ndërsa Toshkovski e mbron kryeshefin e ri.

“Sipas informacioneve tona, Qendrës për punë kufitare-Veri, urdhrin ia ka dhënë kryeshefi i sapoemëruar, Naim Ramuka. Sipas informacioneve që i morëm, një orë para se të kalojnë Gashi dhe krushqit, Naim Ramuka gjoja për shkak të kontrollit, ka ardhur në pikën kufitare. Në fakt, Ramuka ka ardhur që ta sigurojë kalimin e Gashit dhe krushqve pa u kontrolluar”, tha Bogdanka Kuzeska, LSDM.

LSDM kërkon që të deklasifiikohen pamjet nga pika kufitare Bllacë që të shihet se kush ka kaluar pa u kontrolluar. Njëkohësisht, ata thirrën Toshkovskin që të japë dorëheqje, ndërsa Prokuroria të ngrejë hetim të detajuar për këtë ngjarje.

“Siguria në vendkalimet tona kufitare është shkelur, ndërsa kontrolli kufitar tërësisht është suspenduar dhe është vënë nën komandën partiake të VLEN-it dhe DPMNE-së. Kjo është e palejueshme dhe e rrezikshme për një shtet anëtar i NATO-s”, deklaroi Bogdanka Kuzeska, LSDM.

Ministri Toshkovski paraprakisht konfirmoi se Gashi bashkë me krushqit e kanë kaluar pikën kufitare pa u evidentuar në sistemin për kontroll të udhëtarëve nga ana e policisë kufitare, edhe pse, siç shtoi, kryeministri në mënyrë adekuate e ka njoftuar MPB-në për kalimin e kufirit me Kosovë.

I pyetur nëse pas ngjarjeve të fundit, VMRO-DPMNE do ta ndryshojë qëndrimin dhe do ta mbështesë interpelancën për Gashi, që u ngrit për shkak të incidentit në aeroportin e Shkupit, kryeministri Hristijan Mickoski u përgjigj – Jo.

“Mënyra se si sillet si kryeparlamentar në Kuvend, si i udhëheq seancat dhe të gjitha ngjarjet aty, me të vërtet dallon nga sjellja e paraardhësit të tij”, deklaroi Hristijan Mickoski.

Nga Kabineti i Gashit nuk ka reagim për lëshimet e konstatuara për kalimet pa kontroll në pikën kufitare Bllacë.