Objektet hotelierike janë rrezik serioz për përhapje të koronavirusit, prandaj e kufizuam orarin e tyre të punës deri në 18:00, thotë ministri i Shëndetësisë, Venko Filipçe. Por, nga ana tjetër, në qendër të qytetit po vendosen shtëpiza druri ku do të shiten pije dhe gjësende të ndryshe. Fillimisht, nga Qyteti i Shkupit thanë se sivjet nuk do të ketë shtëpiza, por sërish ndërroi mendje. Prej atje thonë se ende nuk dihet ku do të vendosen dhe sa do të jetë largësia mes tyre.
E derisa Qeveria mendon t’i mbyllë lokalet në orën 18, Qyteti i Shkupit hap shtëpiza druri ku qytetarët do të mund të lëvizin dhe të blejnë gjësende të ndryshme ose të pinë nga një pije.
Filipçe thotë se nuk mund t’i ndalojnë tubimet, por shton se kjo luftë në masë të madhe varet nga përgjegjësia, vetëdija dhe ndërgjegjja e qytetarëve.
“Intervenuam me ndalesa atje ku ligji na lejon këtë, kurse me rekomandime atje nuk ligj nuk na lejon. Ne tentuam që me ligj t’i ndalojmë tubimet dhe festat nëpër shtëpi, por doli se ishte kundër Kushtetutës. Qytetarët duhet të jenë të vetëdijshëm se kjo krizë duhet tejkaluar, se nuk duhet të grumbullohen apo grupohen. Është e vërtetë se ka inspektorate të cilat mund t’i kontrollojnë dhe t’i sanksionojnë”, tha Venko Filipçe – Ministër i Shëndetësisë.
Filipçe tha se vendimin për mbyllje të objekteve hotelierike e kanë sjellë sepse atmosfera festive mund t’i bëjë entuziastë qytetarët dhe sepse ka rrezik që qytetarët pas mbarimit të orarit të punës të grumbullohet nëpër lokale.
“Është evidente se mund të ketë grupim të njerëzve, sidomos në objektet hotelierike, duke pasur parasysh se po afrohen festat e Vitit të Ri dhe atmosfera festive do t’i bëjë qytetarët entuziastë”, potencoi ministri i Shëndetësisë, Venko Filipçe.
Masat e reja me të cilat do të kufizohet puna e objekteve hotelierike deri në orën 18, sipas ministrit, mjaftojnë në periudhën para dhe gjatë Vitit të Ri. Masat e tanishme, siç tha, japin rezultat, kurse dëshmi për këtë është stabilizimi i numrit të rasteve të reja dhe ulja e faktorit të transmetimit të sëmundjes në 0.95%. Me këtë masë, hotelierët do të pësojnë goditje edhe më të madhe. Paratë që shteti i jep përmes pakove ekonomike, nuk u ndihmojnë në mënyrë të drejtpërdrejtë sektorëve të gastronomisë dhe hotelierisë. Pronarët kanë luajtur rolin e ndërmjetësuesve mes shtetit dhe të punësuarve për subvencionim të rrogave, por kjo nuk ishte ndihmë e drejtpërdrejtë për ta, pavarësisht nga fakti se edhe ata ishin të prekur nga kjo krizë. Kryetari i Odës së Pavarur të Hotelierisë, Zdravko Josifovski, pohoi se nga të gjitha mjetet të cilat shteti i ka dhënë deri më tani, asnjë masë nuk ishte vetëm për hotelierinë dhe turizmin, me përjashtim të pakos së katërt e cila pritet të realizohet.