Lokalet nuk respektojnë orarin e punës! Mbyllet një restorant në Kërçovë dhe dy kafeteri në Manastir

Objektet hotelierike nuk respektojnë orarin e punës. Kjo irriton banorët që jetojnë afër kafiterive dhe restoranteve, andaj detyrohen të lajmërojnë policinë për të intervenuar.

Edhe pse nuk deshën të flasin para kamerës, ata thonë se i pengon zëri i lartë i muzikës, nuk mund të shplodhen, ndërsa të nesërmen duhet të zgjohen herët për në punë.

Në redaksinë e Tv21 ka arritur një video ku shihet se në një restorant në Kërçovës policia ka intervenuar në orën 1:30 pas mesnate për t’i larguar klientët nga objekti.

Zëdhënësi i Sektorit për Punë të Brendshme-Ohër Stefan Dimoski, tha se kanë vërejtur parregullsi në një restorant të Kërçovës i cili ka shkelur edhe rregullin për orarin e punës por edhe protokollin e qeverisë për Covid-19.

 “Më 9 gusht, policia e Kërçovës ka vërejtur parregullsi në një restorant i cili edhe pas orës 1 pas mesnate ka qenë i hapur. Policia ka intervenuar rreth orës 1:30 minuta, brenda lokalit ka pasur persona të mitur, persona pa maska dhe është konstatuar edhe mosrespektimi i orarit të punës. Janë marrë të gjitha masat e nevojshme dhe po punohet për procedura të mëtutjeshme”, theksoi Stefan Dimovski, zëdhënës i SPB-Ohër.

Tv21 kontaktoi edhe Inspektoratin e tregut në Shkup nga atje na thanë se kanë ngritur procedurë për mbylljen e obejktit në fjalë por edhe për dy objekte tjera hotelierike në Manastir të cilët tanimë janë mbyllur.

 “Inspektorati i tregut në terren ka vërejtur disa parregullsi në Manastir dhe Kërçovë, ku disa objekte hotelierike kanë punuar edhe pas orarit të cilin e kanë të paraparë me ligj. Në Kërçovë është ngritur procedurë për një restorant i cili ka qenë i hapur edhe pas orës 1 të mesnatës, i njëjti pas procedurës do të mbyllet nga 10 deri në 30 ditë dhe do të ketë edhe gjobë në të holla. Ndërsa në Manastir dy objekte hotelierike tanimë janë mbyllur dhe do të jenë jashtë funksionit nga 10 ditë”, thonë nga Inspektorati i Tregut – Shkup.

Nga inspektorati thanë se  kafiteritë dhe restorantet gjatë verës deri më 31 gusht kanë të drejtë që edhe gjatë javës dhe gjatë vikendit të punojnë deri në orën 1 pas mesnate duke respektuar protokollet siç janë mbajtja e maskave dhe distanca fizike.