Vauçerë prej 6 mijë denarëve për blerjen e produkteve vendore mbeti dëshirë e parealizueshme e Vitit të Ri për qytetarët. Pasi që dje drejtorja e DAP, paralajmëroi se Drejtoria deri në fund të kësaj jave duhet të dorëzojë listë të pastruar deri te Sekretariati i përgjithshëm i Qeverisë, për atë se cilët qytetarë duhet të fitojnë vauçerë, reaguan një pjesë e qytetarëve sot.
“Nuk kam kontrolluar, jo… marr 15 mijë denarë, për 100 denarë nuk më takon. . . Si e vlerësoni këtë masë, si pozitive apo negative? Negative, nëse ka le të ketë për të gjithë, nëse s’ka, le të mos ketë për askënd”.
Një pjese të qytetarëve, shfrytëzues të pensioneve, nuk u nevojitet ndihma e Qeverisë.
“Jo, jo, unë jam pensionist. Kam pension dhe kështu po vazhdojë, mirë është.
Nuk kam diçka të tillë, jam pensionistë. Kam mjaftueshëm dhe kjo nuk më intereson”.
Pensionistët të kënaqur, por pakënaqësi mbizotëron te kategoria sociale. Edhe në masat e tilla të Qeverisë ata nuk shohin shpresë për jetë më të mirë.
“Nuk e di nëse jam apo jo.
A ju intereson që të kontrolloni?
Po, më intereson, por nuk kam shpresë e as vullnet për të jetuar. Nga pandemia jemi plotësisht të frikësuar…
Unë kam marrë para kësaj, tani nuk e di a do të më japin. Ne jemi me ndihmë sociale. Nëse na japin mirë do të jetë, nëse jo, ne prapë do të jetojmë…
Atë vauçerë mund ta përdorësh një ditë, e më pas çka, me ata produkte do të kalosh një javë dhe më pas çka do bëjmë, përsëri njëjtë, përsëri duhet të punosh. Le të marrin ata që punojnë në Kuvend nga 6 mijë denarë e le të shohim sa kohë do të kalojnë me ato para”.
Nga DAP dje arriti lajmi se përderisa nuk pastrohet, lista nuk mund të publikohet. Kryeministri Zoran Zaev, sot kumtoi lajmin.
“Këto ditë tashmë ka filluar pagesa, shteti i bën pagesat ndaj bankave, ndërsa të gjithë bankave ku në mënyrë adekuate ka llogari të regjistruar të shfrytëzuesve do tu transferohen paratë”, deklaroi Zoran Zaev – Kryeministër i Maqedonisë së Veriut.
Afati për shpallje të listave dhe afati brenda të cilit qytetarët duhet t’i shfrytëzojnë mjetet është i shkurtër. Tani shtrohet pyetja – nëse ditët të cilat qytetarët do t’i kenë në dispozicion për t’i harxhuar paratë, nuk do të shkaktojnë turma të reja nëpër dyqane në kushte të pandemisë së koronavirusit?
Derisa të kompletohet lista, nga Qeveria thonë se procedura lidhur me atë se në cilat dyqane mund të shfrytëzohen vauçerët, tani është lehtësuar. Me ndryshimin e fundit të Ligjit për Mbështetje Financiare, nuk do të ketë thirrje, kurse ofruesit e produkteve dhe shërbimeve të Maqedonisë, nuk janë të obliguar të regjistrohen në këtë listë, thonë nga Qeveria.
Shtojnë se me një vauçer prej 6.000 denarëve, qytetarët do të mund të blejnë në çdo dyqan. Nga Ministria e Financave nuk morëm përgjigje – çka do të ndodhë me paratë që nuk do të shpenzohen brenda afatit të paraparë ligjor?
Jozyrtarisht, askush nuk do t’i marrë paratë e pashfrytëzuara nga qytetarët edhe pas kësaj date. Rreth 27 milionë euro para shtetërore do të injektohen për të ndihmuar qytetarët. Masa i përfshin qytetarët me të ardhura të ulëta, pensionistët me pension deri në 15.000 denarë, njerëzit e rinj nga 16 deri në 29 vjet, prindërit e vetëm… Mjetet që do t’i marrin duhet t’i shpenzojnë deri më datën 25 të këtij vitit.