Ligji për Lojërat e Fatit përsëri në Kuvend! Opozita: Në vend të flamurit europian, tani sillet me atë sicilian

Opozita shqiptare e kritikon ashpër ligjin për lojërat e fatit. Thonë se BDI me qëllim në dispozitat e këtij ligji me të cilin parashihet që objektet të jenë të paktën 500 metra larg shkollave, i ka përmendur vetëm bastoret por jo edhe kazinotë. Fillimisht me flamur europian, tani me flamur sicilian duan që ta sjellin këtë ligj, tha Izet Mexhiti nga VLEN. Nga opozita shqiptare kërkojnë urgjentisht të dislokohen jo vetëm bastoret por edhe kazinotë.

Pohimin e këtillë e mohon Arbër Ademi nga BDI. Ai thotë se edhe kazinotë janë përfshirë me këtë ligj.

Mexhiti akuzoi se jo vetëm që do të ketë kazino në çdo rrugë, Artan Grubi u ka dhënë licencë 4 kompanive për kazino online që u regjistruan para 2 muajve.

“Krahas projektit-kazino në çdo rrugicë, Artan tani me sukses e zbaton projektin-kazino në çdo shtëpi, duke u dhënë licencë 4 kompanive për kazino online, ku partner është Përparim Bajrami, person i njohur që i zbaton urdhrat e klanit. Lotaria shtetërore Mocart u themelua në janar 2024, Lotaria shtetërore Vezuf u themelua në janar 2024, Lotaria shtetërore 77Bits u themelua në dhjetor 2023”, tha Izet Mexhiti, VLEN.

Ademi thotë se monopoli ndaj kazinove i përket opozitës.

“Qëllimi i VMRO-DPMNE-së dhe opozita e robëruar shqiptare nga VMRO-DPMNE është që të mos sillet ky ligj me qëllim që të vazhdojë monopoli i një kompanie të caktuar që është themeluar në mënyrë kriminale para disa vitesh”, theksoi Arbër Ademi,BDI.

Përndryshe Ligji për lojërat e fatit tashmë është votuar, por presidenti Stevo Pendarovski nuk e nënshkroi dekretin. Ai kërkoi që ligji të kthehet në Kuvend dhe të miratohet me procedurë të rregullt e jo siç u votua paraprakisht me flamur europian.