Përgatitja e Ligjit të ri për Falje është në fazë përfundimtare. Me këtë ligj, Presidenti do të mund të falë vetëm për dënimin, por jo edhe për veprën penale.
“Me projektligjin rregullohet koncepti dhe llojet e faljes, veprimi i faljes, personat e autorizuar për dorëzim të kërkesës për falje, si dhe procedura dhe aktet e organeve kompetente lidhur me faljen. Një nga ndryshimet më të rëndësishme është se Presidenti do të mund të falë vetëm për dënimin, por jo edhe për veprën penale të personave të caktuar. Risia e dytë më domethënëse e paraparë në projektligj është themelimi i një Komisioni në kuadër të Ministrisë së Drejtësisë, i cili do të përpilojë një mendim të arsyetuar me shkrim lidhur me kërkesën dhe bashkë me raportin për kërkesë i dorëzon deri te Presidenti. Me këtë zgjidhje, pritet të tejkalohen rreziqet e mundshme të deritanishme që kanë të bëjnë me të drejtat diskrecionale të ministrit të Drejtësisë”, thonë nga Ministria e Drejtësisë.
Nga Ministria e Drejtësisë thonë se arsyet për miratimin e Ligjit të ri për Falje rrjedhin para së gjithash nga mangësitë dhe zbrazëtitë ligjore në Ligjin ekzistues për Falje. Përveç kësaj, thonë nga Ministria, për shkak të nevojës për përshpejtimin e procedurës, ligji parashikon afate për pjesëmarrësit në procedurën e faljes, kurse është bërë edhe harmonizim terminologjik i emrave dhe termave të caktuar.
“Në atë drejtim janë paraparë afate të shkurtra për secilin nga institucionet që janë përfshirë në procedurën e faljes. Njëkohësisht, rol kyç luajnë edhe dispozitat për përgjegjësinë kundërvajtëse të personave që veprojnë në këto lëndë, bëjnë me dije nga Ministria e Drejtësisë.
Falja si institut është një nga kompetencat themelore kushtetuese të Presidentit të Republikës, të përcaktuara me Nenin 84 të Kushtetutës së RMV-së. Falja është pjesë edhe e Nenit 114 të Kodit Penal, me të cilin determinohen çështjet materialo-juridike të faljes.
Korniza ligjore që rregullon këtë çështje në mënyrë të detajuar, për herë të parë është vendosur në vitin 1993 dhe është ndryshuar dhe plotësuar dy herë – në vitin 2009 dhe 2016-tën.