Lëshohet rruga e rikonstruktuar Ohër – Shën Naum! 24.3 kilometra, investim 11.7 milionë euro

Përfundoi rikonstruktimi dhe u lëshua në përdorim rruga rajonale Ohër–Shën Naum. Me një investim prej 11.7 milionë euro, janë rehabilituar dhe modernizuar 24.3 kilometra të rrugë, duke mundësuar qasje më të sigurt dhe më të shpejtë drejt një prej zonave më të rëndësishme turistike të vendit.

Zëvendëskryeministri dhe ministri i transportit Aleksandar Nikollovski theksoi rëndësinë strategjike të këtij projekti.

Drejtori i Ndërmarrjes Publike “Rrugët Shtetërore”, Koce Trajanovski, vlerësoi se ky është një nga projektet kyçe infrastrukturore që përfundon me sukses. Paralajmëroi se së shpejti do të lëshohet në përdorim edhe një sërë projektesh të tjera në mbarë vendin.

Kryetari i Ohrit, Kirill Pecakov, shprehu mirënjohjen e tij duke thënë se u zgjidh një nga problemet më të mëdha infrastrukturore që kishin si komunë.

Pritet të shihet nëse këtë verë do të lëshohen në përdorim edhe 40km e para të autostradës Kërçovë-Ohër, gjegjësisht nga fshati Arbinovë deri në Ohër, që u premtua se do të jetë gati në fund të majit por që nuk u arrit përfundimi i së njëjtës.