Sulmuesi anësor i Barcelonës, Lamine Yamal, është shpallur futbollisti i sezonit në La Liga, njoftoi sot liga spanjolle e futbollit.
18-vjeçari Yamal ndihmoi Barcelonën të mbrojë titullin kampion të Spanjës sezonin e kaluar. Ai u bë futbollisti i parë që fitoi çmimin “Lojtari i Muajit” në La Liga tri herë brenda një sezoni dhe e mbylli kampionatin si golashënuesi më i mirë i klubit me 16 gola, duke regjistruar edhe 11 asistime.
Për shkak të një dëmtimi në tendinë, Yamal mungoi në gjashtë ndeshjet e fundit të sezonit me Barcelonën, por pritet të jetë gati për përfaqësuesen e Spanjës në Kupën e Botës, e cila nis javën e ardhshme në Kanada, Meksikë dhe Shtetet e Bashkuara të Amerikës.
Yamal debutoi në moshën 16-vjeçare dhe ishte pjesë kyçe e triumfit rekord të Spanjës në Euro 2024, ku kombëtarja spanjolle fitoi titullin e katërt evropian.