Lajmet e rrejshme dhe pasojat prej tyre/ “Duhet bërë dallimi mes dezinformatës, lajmit të rremë dhe keqinformimit”

-Desha me Elidën të sqarohemi sepse nuk pajtohet me ju se “fake news-i” mund të jetë i vërtetë.

-Jo, assesi “fake news-i” nuk mund të jetë i vërtetë.

-Ore, unë po ju them që gjithmonë ka dy të vërteta.

– Agron nuk mund rrena të jetë e vërtetë, tash më shkurt t’i biem.

-Jo, rrena moj.

Këndvështrimet e ndryshme mbi lajmet e rrejshme, e ashpërsuan debatin e mbrëmshëm në “Click Plus”. Sipas profesorit, Agron Vrangalla duhet bërë dallimi midis një dezinformate klasike dhe lajmeve të rrejshme që sipas tij plasohen me qëllime të caktuara.

“Këto lajme quhen “fake news”, këto lajme mund të jenë të sakta 100%. Në ç’kuptim? Ato mund të kenë 3 burime të sakta, mirëpo këto burime të jenë me qëllime të caktuara që të plasojnë një ideologji të caktuar, d.m.th. “Fake news” mund të jetë i vërtetë komplet, ama burimet që përdor i ka që të çojë ujin te mulliri vet”- deklaroi Agron Vrëngalla, profesor.

Por Elida Zylbearin nga “Metamorphosis” theksoi se lajmet e rreme ndonjëherë mund të bazohen edhe në gjysmë të vërteta.

“Vetë fjala lajm i rremë do të thotë se është i rremë. Mund të bazohet në gjysmë të vërteta, në spine, propagandë, një anshmëri, gjithçka, në njerëz që vërtetë ekzistojnë. Synimi kryesor i mediave është që ta tregojnë realitetin. Asnjë njeri në botë nuk mund ta kap të gjithë realitetin. Pse Agron hyn në gjëra filozofike, kur flasim për gjëra shumë më konkrete”, pohoi Elida Zylbeari, “Metamorphosis”.

Sipas Sefer Selimit nga “Democracy Lab”, lajmet e rrejshme bëhen për qëllime të ndryshme nga njerëz të ndryshëm për të shkaktuar trazira në momentet më kritike për një shtet dhe shoqëri. Ndërsa, shtoi se shpesh herë lajmet e rrejshme krijohen nga njerëzit thjeshtë për fitime financiare.

“Lajmet e rrejshme mund të prodhohen nga njerëz të cilët janë kompetent, janë njerëz të cilët kanë një funksion publik, të cilët pa dashje krijojnë një lajm të rremë i cili në rast se është i paqëllimshëm është keqinformim, në rast se është bë me qëllim është lajm i rrejshëm. Ke shtetet, aktorët e tretë të cilët kanë qëllime dhe objektive që cilat duan ti arrijnë përmes lajmeve të rreme dhe kampanjave dezinformuese dhe ke profiterët”, tha Sefer Selimi, Democracy Lab.

Shteti duhet të bëjë më shumë në drejtim të parandalimit të shpërndarjes së lajmeve të rrejshme, ndërsa panelistët gjithashtu theksuan se duhet të futet lëndë e edukimit mediatik në shkolla.