Qeveria e Kuvajtit sot miratoi vendim për të vendosur karantinë të plotë, që do të fillojë prej kësaj fundjave, në përpjekje të parandalimit të koronavirusit, pasi numri i raste në këtë vend u rrit ndjeshëm, njoftoi DPA.
“”Ora e plotë policore” në nivel kombëtar do të hyjë në fuqi nga e diela në ora 16 me kohën lokale dhe do të zgjasë deri më 30 maj, kumtoi agjencia zyrtare e lajmeve të Kuvajtit.
Qeveria e miratoi këtë vendim si pjesë e masave qëllimi i të cilave është të izolohet virusi, shtoi agjencia pa dhënë detaje.
“Vendimi vjen pas rekomandimeve të autoriteteve shëndetësore,” deklaroi zëdhënësi i qeverisë, Tarik al-Mazrem.
Më herët të premten, shtoi DPA, Ministria e Shëndetësisë e Kuvajtit kumtoi për 644 raste të reja të infektimit me koronavirus, duke e rritur numrin e përgjithshëm të të infektuarve në vend në 7.208, nga të cilat 47 kishin pasoja fatale.
Karantina do t’i ndalojë njerëzit të dalin jashtë, përveç për ushqime dhe ilaçe, publikoi gazeta nga Kuvajti “al-Kabas”, duke iu referuar një zyrtari qeveritar anonim. Me vendimin ndalohet gjithashtu edhe lëvizja në rajonet e vendit.
Autoritetet e Kuvajtit më parë kanë ndërmarrë një seri masash kundër paraqitjes së virusit, që përfshinin orë policore të natës, mbylljen e të gjitha institucioneve arsimore deri në gusht dhe ndërprerjen e institucioneve qeveritare, njoftoi agjencia gjermane e lajmeve./MIA