Kurti e Makron flasin në telefon për dialogun Kosovë-Serbi

TË FUNDIT

Kryeministri në detyrë i Kosovës, Albin Kurti mbrëmë ka pasur një bisedë telefonike me presidentin e Francës, Emanuel Makron, të cilin e informoi për situatën aktuale në vend në planin shëndetësor dhe politik, si dhe e falënderoi për ndihmën nga Franca dhe nga Bashkimi Evropian për përballje me epideminë e Kovid-19.

Siç kumtoi shërbimi qeveritar për informim, kryeministri e ka informuar presidentin francez për veprimet që i ndërmerr qeveria për përballjen me koronavirusin dhe rezultatet të cilat ata i japin, duke theksuar se lufta kundër Kovid-19 mbetet prioritet kryesor i kabinetit të tij.

Kurti e falënderoi Makronin edhe për deklaratën e përbashkët franko-gjermane në lidhje me mocionin e mosbesimit të qeverisë së tij nga ana e Kuvendit të Kosovës, pas çka më 13 mars u votua mosbesimi.

Sipas kryeministrit të Kosovës “zbrazëtira e krijuar nga ky mocion nuk mund të mbushet, as kriza politike nuk mund të tejkalohet, veçse nëpërmjet zgjedhjeve të reja, e vetmja mënyrë legjitime dhe legale për vënien në jetë të një qeverie të re”, shtohet në kumtesë.

Në të shtohet se Makroni i ka dhënë mirënjohje qeverisë së Kosovës për mënyrën në të cilën përballet me epideminë e Kovid-19.

Presidenti francez dhe kryeministri i Kosovës kanë biseduar edhe për dialogun mes Prishtinës dhe Beogradit dhe për “angazhimin adekuat me qëllim të zbatimit të përgatitjeve të nevojshme për pjesëmarrje reale të palëve në atë dialog”.

Në atë pikëpamje, thuhet në kumtesë, Makroni e ka mbështetur restaurimin e qarkullimit të mallrave mes Kosovës dhe Serbisë, pasi qeveria e Kurtit e ka hequr taksën prej 100 për qind të importit nga Serbia dhe BeH-ja.

“Ai premtoi rritjen e rolit të Francës dhe të atij vetë në lehtësimin e dialogut. Ky do të jetë, sipas tij, edhe synimi i samitit të Parisit për marrëdhëniet Kosovë-Serbi, samit i organizuar nën drejtimin e Francës dhe Gjermanisë, me Bashkimin Evropian, sapo të krijohen kushtet e duhura”, thuhet në kumtesë.

Kurti, nga ana e tij, ka premtuar se “Evropa nuk do të përjetojë një befasi, sepse qeveria shikon në zbatimin e reciprocitetit si në zbatimin efikas, në atë që e përmbajnë marrëveshjet nga Brukseli”./MIA

 

MARKETING I PAGUAR POLITIK