Kur do të rinisë puna në spitalin e Kërçovës? Taravari pat thënë në pranverë 2025, tani thotë se ende janë në negociata

Ende po pritet përfundimi i spitalit të Kërçovës, që ka nisur të ndërtohet para 40 vitesh, por edhe rikonstruktimi i atij të Shtipit. Ministri i Shëndetësisë Arben Taravari thotë se nuk i ka harruar, gjersa tregoi se Qeveria është në negociata me një shtet evropian që do të ndërmerrte përsipër ndërtimin e dy spitaleve.

“Nuk është harruar aspak jemi në rrjedha bëhet fjalë për spitalin e përgjithshëm të Shtipit, fakultetin e mjekësisë në Shkup, spitalin e Kërçovës dhe një ndërtesë në spitalin e Tetovës, është në procedurë negociatat i bëjmë si qeveri por paketa e marrëveshjes nuk është vetëm shëndetësia por janë edhe lëmi tjera. Unë besoj se së shpejti qeveria do të nënshkruaj një marrëveshje strategjike me një shtet të rëndësishëm Evropian për ti ecur këto projekte”, tha Taravari.

Në gusht 2024, kur e vizitoi Kërçovën pasi mori detyrën si Ministër, Taravari pati premtuan se në mars-prill 2025 do të rifillonin punimet në spitalin e këtij qyteti. Marsi iku, jemi në gjysmë të prillit dhe punimet ende nuk kanë nisur.

“Ka qenë mosinteresim i qeverive të kaluara tash them kur është diçka prioritare ne i kushtojmë më shumë vëmendje, kështu që shihemi ka marsi, prilli vitin e ardhshëm kur do të fillojnë punimet këtu në Kërçovë”,deklaeoi Taravari.

Në një deklaratë që e ka dhënë në nëntor 2024 pat thënë se viti 2027 do të jetë viti që dy spitalet e lartpërmendura do të vihen në funksion. Nga anketat që kemi bërë më parë me kërçovarët, ata janë shprehur skeptik për përfundimin e këtij spitali. Ndryshe, Arben Taravari është ministri i 18 në krye të shëndetësisë që premton ndërtimin e Spitalit të Kërçovës.