Kryetarja e Qytetit të Shkupit, Danella Arsovska nuk do të shkojë për pushime verore me qëllim që ta bëjë Shkupin modern. Këtë e dëgjojmë tashmë dy vjet, por siç duket edhe partia në pushtet njëjtë si ajo në opozitë që e përkrahu kandidaturën e saj, nuk janë të kënaqur me punën e saj.
“Opozita lavdërohej se do ta bënin Shkupin Metropol, shihni se si është tani, asgjë që filloi të ndërtohej nuk mund të realizohet deri në fund. Për këtë arsye unë planifikoj që ta thërras kryesinë e Shkupit që të shohim se si mundemi ne si Qeveri të ndihmojmë, për shkak se qytetarët meritojnë të jetojnë në kryeqytet që i ngjan metropoleve të tjera e jo të dëgjojnë se si grinden VMRO-DPMNE dhe kandidatja e tyre, se kush ka të drejtë”, Dimitar Kovaçevski, kryeministër.
Shkupi dikur ka qenë qytet modern, por tani është i mbipopulluar dhe pa nevojë ndërtohen ndërtesa të larta, dhe tani është larg atij moderniteti, thotë arkitekti Mishko Ralev në intervistën javore për Radion Europa e Lirë. Por a beson ai ende se Shkupi është qytet modern?
“Epo, ky qëndrim im tashmë bëhet problematik. Ky qëndrim në fakt ka të bëjë me Shkupin pas tërmetit, kur ishte vërtet një qytet modern, kur ishte prijës në Jugosllavinë e atëhershme ku modernizmi nuk ishte vetëm stil shtetëror, por mund të themi një ideologji shtetërore në aspektin arkitekturor, të kulturës dhe artit. Sot, moderniteti është ndoshta vetëm një shënues kohor se është bashkëkohor, se është modern, por është larg asaj që ishte si qytet modern”, tha Mishko Ralev, arkitekt.
Kryetarja e Qytetit të Shkupit, Danella Arsovska, thotë se aktualisht është duke u punuar në Planin e përgjithshëm Urbanistik, që duhet të jetë udhërrëfyes se si do të zhvillohet qyteti në 10 vitet e ardhshme. Kërkoi që të ndërtohet në mënyrë humane në qytet, por edhe të respektohen standardet e ndërtimit, që ajo që ndodhi 60 vite më parë me tërmetin katastrofik të mos përsëritet më.
“Ka plane të detajuara urbanistike me të cilat atë që ne duam ta parandalojmë, të kalojë në mënyrë joligjore nëpër institucionet tona. Prandaj apeloj për secilin prej jush, për të gjithë ne, për fëmijët tanë, të ngrini zërin, të flisni me zë të lartë, të jepni gjithmonë ekspertizën tuaj aty ku është e nevojshme, gjithçka që mendoni se mund të bëni për të kontribuar për qytetin tonë që i njëjti të zhvillohet si qytet, në të cilin nuk do të lejojmë të sundojë mafia urbane dhe të gjithë ata që duan që qyteti të ndërtohet dhe të zhvillohet në mënyrë johumane”, theksoi Danella Arsovska, kryetare e Qytetit të Shkupit.
Këtë javë Shkupi shënoi 60 vjet nga tërmeti katastrofik, pas të cilit pamjen e qytetit e projektoi arkitekti Kenzo Tange. Ndër idetë e tjera të Kenzos, është edhe ajo që rruga e njohur si “Rekord” të bëhet zonë këmbësore.