Zëdhënësi i BDI-së, Bujar Osmani duke folur rreth pakënaqësive të “grupit të zjarrit”, shprehet se në BDI gjithmonë ka ekzistuar demokracia që gjithkush ta thotë mendimin ndryshe, por kjo deri në një pikë sa të mos kalojë në anarki, përndryshe duhet ndërmarrë masa!
“BDI njihet për demokracinë e brendshme, për mundësinë që njerëz të ndryshëm të parashtrojnë ide të ndryshme që dallohen nga ideja e shumicës, por kjo është deri në kufirin që nuk kalon në anarki, atëherë secila organizatë merr masa për ta ruajtur funksionin. Kam ndjesinë se tashmë jemi në këtë kufi edhe pse atë kulturë në BDI secili ta thotë qëndrimin edhe publikisht, edhe nëse është ndryshe nga shumica, atë do ta inkurajojmë, por vendimmarrja do të mbetet me shumicë”, tha Bujar Osmani, zëdhënës i BDI-së.
E nga tubimi që e patën mbrëmë në Kumanovë, Musa Xhaferi tha as ai nuk ndjehet mirë për këtë që po ndodh brenda BDI-së, por përfundoi se në parti iu mbyllën të gjitha kanalet e komunikimit.
“Na paraqesin si fraksion. Mjekët fraksionin e quajnë si thyerje, si krah i thyer, por jo nuk jemi ashtu. Duhet të kuptohemi drejtë. Për fat të keq ne dialogun e bëjmë nëpërmjet tubimeve, në fakt nuk ka dialog brenda organeve tona. Ne nuk jemi të lumtur që flasim përmes tubimeve, mediave, press konferencave. Neve na u mbyllën të gjitha kanalet. Ne kërkuam që të na raportohet për punën e bërë”, tha Musa Xhaferi, kryetar i Këshillit Mbikëqyrës të BDI-së.
Edhe sipas Nevzat Bejtës askush nuk mund t’i largojë nga partia për shkak se për partinë kanë dhënë mund dhe sakrificë.
“Nuk është lehtë dikush të na thotë largohuni nga shtëpia se ne 20 vjet, bashkë me anëtarësinë dhe me votuesit shqiptar kemi sakrifikuar, familjet tona, vetveten për të mirën e BDI-së”, tha Nevzat Bejta, BDI.
Nga ana tjetër, nga Sellca e Tetovës nënkryetari tjetër i BDI-së, Arbër Ademi, i dërgoi mesazhe grupit të të pakënaqurve.
“Ne po bëjmë thirrje për misione, e jo për funksione. Sigurisht se rrezikojmë të dalim nga misioni nëse unë si Arbër Ademi them, mos të jetë Kreshnik Bekteshi ministër i Ekonomisë, po të jem unë. Mos të jetë Artani, po të jem unë. Mos të jetë Bujari, po të jetë Jetoni, Nazimi e kështu me radhë”, pohoi Arbër Ademi, nënkryetar i BDI-së.
Dy grupet e BDI-së po i vazhdojnë takimet me qytetarë dhe mbështetës të tyre. Ahmeti me ministra nën sloganin “Bashkë për Europë” këtë javë po qëndrojnë nëpër Tetovë, kurse i a.q. grupi i zjarrit nesër qëndron në Shkup.