KSHZ: E Majta dhe ASH&AAA me ankesa për manipulime në procesin zgjedhor

TË FUNDIT

Deri në orën 18:00 deri në KSHZ nuk arritur asnjë ankesë në lidhje mbledhjen e votave dhe  verifikimin e rezultateve. Ndërsa partitë politike kanë afat ta bëjnë këtë deri në ora 19:30. Vetëm partia  “E majta” ka paralajmëruar se do të dorëzojë mbi 400 ankesa për numërim manipulues të votave në më shumë vendvotime, me të cilat pretendon se kësaj partie i janë shkurtuar 3 deputetë. Ndërsa për procesin e votimit më së shumti ankesa ka dorëzuar koalicioni Alternativa dhe Aleanca për Shqiptarët, gjithsej 74 që kanë të bëjnë me parregullsi, si blerje votash, votim pa nënshkrim dhe nënshkrime të dyfishta.

“Në shumicën e rasteve ankesat të cilat janë të deponuara në KSHZ janë për numrin e përgjithshëm të fletvotimeve të pavlefshme, kërkohet kontroll i atyre fletëvotimeve dhe të verifikohen edhe njëherë, ndërsa ka edhe ankesa të cilat godasin procesin e votimit në njësinë zgjedhore numër 5 mirëpo fotografi të qartë do të kemi kur edhe të vendoset në lidhje me këto ankesa  nga ana e KSHZ-së”. Tha Shabani.

Ndërsa sot VMRO-DPMNE e përsëriti qëndrimin se mbetet në kërkesën që numërimi i votave të përsëritet edhe njëherë.

“KSHZ është e obliguar t’i zbardh të gjitha dyshimet për parregullsitë dhe falsifikimet, përfshirë edhe numërimin në dorë të fletëvotimeve, sepse nuk guxon të ketë njollë të zezë në proces përskaj kësaj mitoje masive dhe falsifikim”, deklaroi Dimçe Arsovski, zëdhënës i VMRO-DPMNE-së.

Reaguan nga LSDM përmes një kumtese duke thënë se Oliver Derkovski është kryetar I KSHZ-së nga radhët e VMRO-DPMN-së dhe i ka borxh opinionit publik shpjegim për ndodhitë në ditën e zgjedhjeve dhe publikimin e rezultateve. Është e kotë që VMRO-DPMNE të kërkoj justifikime për humbjen e tyre sepse qytetarët treguan se çka duan , theksohet në kumtesën e socialdemokratëve.

Të vetmit që deri më tani nuk kanë dorëzuar ankesa për procesin zgjedhor janë koalicioni “Mundemi”, BDI dhe PDSH. Sipas Kodit zgjedhor KSHZ ka afat 72 orë që të vendosë cilën nga ankesat do të pranohen, pas çka partitë vendimet e KSHZ-së mund t’i ankimojnë në Gjykatën Administrative dhe deri sa të përfundojë e gjithë kjo procedurë rezultatet e zgjedhjeve nuk llogariten si përfundimtare.