Kryegjyshi Bektashian merr pjesë në 485-vjetorin e themelimit të teqesë “Harabati-Baba”: Kjo teqe ka qenë fanari ndriçues i besimtarëve!

Kryegjyshi Botëror Bektashian, Haxhi Dede Edmond Brahimaj, ka marrë pjesë sot në 485-vjetorin e themelimit të teqesë “Harabati-Baba”, në Tetovë. Kryegjyshi Botëror Bektashian në një intervistë të shkurtër për TV21, tha se kjo teqe është e një rëndësie të veçantë për kombin shqiptar, por dhe për shtetin e Maqedonisë së Veriut, sepse ka qenë fanari ndriçues i të gjitha kohërave për komunitetin bektashian dhe mysliman në vendin tonë.
Baba Mondi shprehu ngushëllimet për viktimat në tërmetin e fundit që goditi Sirinë dhe Turqinë gjatë ditës së djeshme, dhe u lut për viktimat dhe të lënduarit nga kjo tragjedi duke u uruar atyre shërim të shpejtë. Ai, gjithashtu, bëri thirrje për bashkim me njëri-tjetrin në këto ditë të vështira për të gjithë.
“Kjo teqe ka një rëndësi të madhe për kombin shqiptar por edhe për shtetin e Maqedonisë së Veriut. Për arsye se i ka dhënë njerëzimit, ka ndihmuar të varfërit që nuk kanë mundur të jetojnë në kushte si gjithë të tjerët. KA qenë qendra e diturisë. Gjithashtu ka qenë një gjyshatë që i ka dhënë këtij komuniteti. KA qenë fanari ndriçues i besimit mysliman, gjithashtu edhe i bektashinjve, por edhe qendra që ka nxjerrë dervishë edhe baballarë për të furnizuar gjithë Ballkanin.
Lutemi edhe për këtë situatë të vështirë që ndodhen vëllezërit tanë në Turqi e Siri për shkak të tërmetit që ka prekur këto dy vende, sidomos për fëmijët. Me lutjet tona jemi pranë tyre. Ky 485 vjetor të na japi frymëzim për të ardhmen, për të qenë sa më të bashkuar me njëri tjetrin në këto ditë të vështira.”- tha Baba Mondi.