Kryeparlamentari Afrim Gashi, si dhe krushqit që kanë shkuar në Kosovë, nuk janë kontrolluar fare në pikën kufitare Bllacë, thonë nga LSDM. Partia opozitare kërkon dorëheqjen e ministrit të Punëve të Brendshme, Pançe Toshkovski dhe akuzon se kufiri shtetëror trajtohet sikur të ishte pronë partiake e VLEN-it dhe VMRO-DPMNE-së.
“Kufiri me Bllacën është privatizuar tërësisht për nevojat e Gashit, me miratimin e MPB-së dhe zyrtarëve përgjegjës. Kjo cenon sigurinë e shtetit dhe kontrollin e pasagjerëve, i cili është i detyrueshëm me ligj”, tha Bogdanka Kuzeska, LSDM.
Nga LSDM-ja kërkojnë që të reagojë Prokuroria Publike, si dhe kontrolli i brendshëm në MPB për të përcaktuar, siç thonë ata, nën komandën e kujt janë lejuar të kalojnë automjetet dhe personat privatë lirshëm dhe pa asnjë kontroll në pikën kufitare.
“Sipas informacioneve që denoncuesit ia kanë dhënë LSDM-së, kufiri me Kosovën ka qenë i hapur për veturat zyrtare të Gashit, por edhe për vetura të tjera private që po ashtu kanë qenë pjesë e procesionit që ka shkuar për nusen. Të gjitha veturat e Gashit, sigurimi i tij dhe veturat private kanë kaluar pa kontroll”, tha Bogdanka Kuzeska.
Ministri i Punëve të Brendshme, Pançe Toshkovski, në profilin e tij në Facebook, ka konfirmuar një pjesë të informacionit të LSDM-së dhe ka theksuar se ka pasur lëshime. Ai tha se ligjet duhet të zbatohen për të gjithë në mënyrë të barabartë dhe kërkoi që punonjësit e policisë të refuzojnë urdhrat e paligjshëm.
“Do të merren masat e duhura për vendosjen e përgjegjësisë në përputhje me Marrëveshjen Kolektive të MPB-së për dështimet e identifikuara operative nga Qendra Rajonale për Çështje Kufitare Veri ndaj kreut të turnit në pikën kufitare”, deklaroi Pançe Toshkovski, ministër i Brendshëm .
Siç shkruan Toshkovski, me kontrollet e bëra në sistemin e kontrollit të pasagjerëve dhe automjeteve është konstatuar se shefi i delegacionit, si dhe familjarët e tij për të cilët është paralajmëruar dalje, nuk regjistrohen në sistemin e kontrollit të udhëtarëve dhe automjeteve.
“Është konstatuar se nuk është respektuar plotësisht procedura e regjistrimit të të gjithë personave dhe pasagjerëve që kalojnë pikën kufitare në sistemin e kontrollit të pasagjerëve dhe automjeteve”, tha Toshkovski.
Nga kabineti i kryeparlamentarit Gashi nuk ka asnjë reagim për akuzat e LSDM-së, por ka reaguar koalicioni VLEN. Nga atje thonë se Afrim Gashi së bashku me familjen e tij kanë kaluar kufirin në mënyrë adekuate.