Siguria dhe integrimi i Ballkanit perëndimor në BE ishin dy temat në forumin dyditor në Strugë. Mesazhi është i qartë, BE-ja duhet të ketë vizion të qartë për vendet e Ballkanit perëndimor. Presidenti Stevo Pendarovski nuk është i lumtur që për shkak të luftës në Ukrainë përsëri u ringjall pyetja për zgjerimin e BE-së. Ai tha se ky proces u duhet vendeve me qëllim që të përparojnë. Presidenti kroat e kritikoi BE-në dhe institucionet europiane duke thënë se Ballkani perëndimor u shndërrua në nënçmim, duke e përmendur Shqipërinë e cila për shume vjet është anëtare e NATO-s ndërsa nuk mund të bëhet anëtare e BE-së.
“Kemi sfera të ndikimit dhe lojëra të froneve. Nuk duhet të jemi të përgjakur si në filmin serik megjithatë kemi kontest pikërisht për këtë”, tha Zoran Millanoviq, president i Kroacisë.
Me qëndrimin e njëjtë është edhe kryeministri i Malit të Zi, Dritan Abazoviq i cili në studion e hapur në TV21, në mënyrë të hapur dhe pa rezervë e kritikoi BE-në.
-Nuk po them se nuk varet gjithçka prej nesh. Pjesa më e madhe e punëve varet nga ne. Kur po them ne, fjalën e kam për të gjitha shtetet, për Malin e Zi, Maqedoninë e Veriut dhe të tjerët. Por, diçka varet edhe nga BE-ja, tha Dritan Abazoviq, kryeministër i Malit të Zi.
-Çfarë për shembull?
-Ja, unë do t’ju them për shembull. Nëse mendojnë se pas pushtimit rus ndaj Ukrainës duhet të sillen në mënyrë të papërgjegjshme ndaj Ballkanit perëndimor…
-Çfarë do të thotë në mënyrë të papërgjegjshme?
-Kjo është kjo. Vazhdimisht të përcjellin mesazhe se ka ndikim rus, ndikim kinez, duhet ta bëni këtë, duhet ta ndryshoni metodologjinë, ndërsa në anën tjetër të mos ndodhë asgjë. Unë mendoj se kjo taktikë është e gabuar dhe se mungon vizion. Me të vërtetë e mendoj këtë. Nëse dikush mendon se Maqedonia e Veriut duhet ta ndryshojë emrin dhe të mos ketë shans për t’i filluar negociatat, ndoshta dikush në Bruksel mendon se kjo është në rregull, unë nuk mendoj ashtu, shtoi Dritan Abazoviq, kryeministër i Malit të Zi.
Gjatë këtyre dy ditëve u bisedua edhe për “Ballkanin e Hapur” dhe nëse kjo iniciativë mund të jetë zëvendësim për procesin e Berlinit ose të BE-së.
“Ballkani i Hapur duhet t’i përfshijë të gjitha 6 vendet e Ballkanit perëndimor. Por atëherë të gjithë do të pyesin se çfarë do të bëhet me Procesin e Berlinit. Për momentin unë si president i shtetit mendoj se Procesi i Berlinit duhet të kuptohet dhe të pranohet si një çadër për këtë rajon, për Ballkanin perëndimor. Të jetë vetëm një iniciativë globale si lidhje mes BE-së dhe Ballkanit perëndimor”, tha Stevo Pendarovski, president i RMV-së.
“6 vende të Ballkanit perëndimor duan të jenë pjesë e BE-së. Në vend të pritjes së gjatë, duhet të komunikojmë mes vete dhe të bashkëpunojmë. Mendoj se Ballkani i hapur është iniciativë e mirë duke pasur parasysh edhe bashkëpunimin ekonomik që duhet t’i përfshijë këto 6 vendet e Ballkanit perëndimor dhe të gjitha kombet e rajonit, por procesi i Berlinit duhet të jetë çadër në këtë bashkëpunim politik”, u shpreh Bajram Begaj, president i Shqipërisë.
“Si ekonomist preferoj që rajoni i Ballkanit të jetë i hapur. Shkëmbim tregtar, lëvizje e njerëzve, kjo është diçka që mund të arrihet ose përmes Ballkanit të hapur ose procesit të Berlinit ose përmes një procesi tjetër. Mendoj se kjo është e mirë. Por mendoj se kjo çështje është e politizuar në Malin e Zi dhe u prezantua në mënyrë të gabuar, në botën serbe, në botën shqiptare etj. Megjithatë nëse largohemi pak dhe e mbikëqyrim këtë çështje në aspekt ekonomik, besoj se kjo iniciativë po sjell shumë vlera dhe është pozitive”, deklaroi Jakov Millatoviq, president i Malit të Zi.
Në këtë forum u shënua 5 vjet nga nënshkrimi i Marrëveshjes së Prespës që i hapi dyert të shtetit tonë drejt NATO-s dhe është bërë hap drejt BE-së. Mysafirët u pajtuan se fakti që opozita në Maqedoni dhe Greqi nuk kërkon shfuqizim të kësaj marrëveshjeje është tregues se sa kjo marrëveshje është e mirë dhe e suksesshme. Jovica Paunoski, TV21, Strugë.