Sjellje e paprecedentë dhe shkelje e Konventës së Vjenës për Diplomatët – kështu e vlerësoi Kabineti i presidentes së Kosovës Vjosa Osmani sjelljen e sigurimit të aeroportit në Shkupit. Sipas njoftimit të kabinetit të saj, sigurimi ia ka kërkuar telefonin dhe bagazhet personale për kontrolle me skaner, edhe pse presidentja ka privilegje diplomatike.
“Përkundër shpjegimit të rregullave qe ekipi i Presidentes ia ka bërë të ditur zyrtarit të aeroportit, ai ka tentuar fizikisht ta shtyjë Presidenten me ç’rast është detyruar që të reagojë Policia e Kosovës për ta hapur rrugën. Kjo sjellje e zyrtarit maqedonas të aeroportit është në kundërshtim me çdo praktikë ndërkombëtare, sipas të cilave kur krerët e shtetit udhëtojnë, ata mbrohen me privilegje e imunitete diplomatike”, thonë nga kabineti i presidentes Vjosa Osmani.
Prej atje shtojnë se në mënyrë të rregullt e kanë paraqitur presidenten në aeroportin e Shkupit.
“Në kundërshtim me këto rregulla, pala maqedonase ka marrë çantën personale të dorës së presidentes. Edhe pse kjo ishte kundër rregullave, ekipi i Presidentes e ka lejuar në mënyrë që Presidentja të hyjë në aeroport, konkretisht në sallën VIP, e cila ishte rezervuar me notë verbale të Ambasadës sonë, siç është praktika për udhëtimet e krerëve të shtetit. Mirëpo, për arsye të sigurisë, në asnjë mënyrë nuk është lejuar që të dorëzohet telefoni personal”, deklaruan nga kabineti i Vjosa Osmanit.
Nga aeroporti, përkatësisht TAV Maqedoni, i hedhin poshtë akuzat e tilla. Prej atje thonë se të gjithë pasagjerët, bagazhi i kabinës dhe sendet e tyre personale me të cilat udhëtojnë në fluturimin komercial, siç është në këtë rast, janë objekt i kontrollit të sigurisë.
“Konventa e Vjenës për Marrëdhënie Diplomatike i përjashton nga kontrolli i sigurisë vetëm mysafirët zyrtarë të Qeverisë së Republikës së Maqedonisë së Veriut ndërsa operatori i aeroportit merr njoftim zyrtar për përjashtime të tilla nga Ministria e Punëve të Brendshme. Udhëzimet që i mori Departamenti ynë i Sigurisë nga Departamenti për Mbrojtjen e Personave dhe Objekteve të përcaktuara tregon qartë se anëtarët e delegacionit duhet t’i nënshtrohen kontrollit standard të sigurisë në përputhje me procedurat e përcaktuara”, thotë TAV.
Sipas ambasadorit Muhamed Halili, nëse presidentja ka udhëtuar zyrtarisht, ndërsa ambasada e Kosovës e ka paraqitur transitin, atëherë bëhet fjalë për incident. Por nëse transiti nuk ishte paraqitur dhe presidentja ka udhëtuar privatisht, ajo duhej ta kalonte kontrollin si të gjithë pasagjerët e tjerë.
Halili shton se në këtë rast edhe valixhja e dorës dhe anëtarët e delegacionit të saj duhet respektuar rregullat e përcaktuara me Konventën e Vjenës. MPJ e Kosovës paralajmëroi se për rastin do të kërkojë sqarime nga homologët e Maqedonisë. Prej atje ngjarjen e vlerësuan si të padenjë.