Nëse duam ekonomi të suksesshme dhe biznes funksional duhet ta çrrënjosim korrupsionin. Ky është konkluzioni i përbashkët i qeverisë dhe sektorit joqeveritar. Njeriu i parë i cili ka për obligim ta luftojë korrupsionin, rikujtoi se kodeksi etik i cili e miratoi ky pushtet i ka dhënë rezultatet e para.
“Tashmë një pjesë e madhe e drejtorëve dhe funksionarëve janë shkarkuar jo me iniciativë të dikujt tjetër por pas konstatimeve për shkelje të vetë kodeksit. I obliguam të gjitha institucionet kompetente, duke përfshirë edhe komunat, që në afat prej 30 ditëve, këto 30 ditë kaluan për t’i publikuar të gjitha dokumentet e qasshme. Ky do të jetë edhe njëri prej kushteve që komunat të marrin përkrahje financiare edhe nga Buxheti i institucioneve ndërkombëtare”, tha Lupço Nikollovski – zëvendëskryeministër për luftë kundër korrupsioni.
Nikollovski paralajmëroi se në të ardhmen do të vendoset inspektim elektronik ose i ashtuquajturi E-inspektor i cili duhet ta ulë ndikimin subjektiv të inspektorit. Sektori joqeveritar me vërejtje se ndërmarrjet publike dhe shoqatat aksionare me vite të tëra e kanë shmangur syrin e Revizorit.
“Nuk ka dhe nuk zbatohet procedurë për zgjedhje të anëtarëve të Bordeve mbikëqyrëse drejtuese brenda këtyre ndërmarrjeve të cilat më së shpeshti plotësohen me kuadro partiake. Shqetëson pasqyra financiare e disa ndërmarrjeve, gjë që e rrezikon punën e tyre duke i bërë shërbimet për qytetarët jocilësore, të pa qasshme për të gjithë, që gjeneron rreziqe për korrupsion. Mungon mbikëqyrje efikase ndaj këtyre ndërmarrjeve për shkak se ka pasur vetëm 9% revizione të realizuara nga ana e shtetit gjatë 15 viteve të fundit”, potencoi German Fillkov – Qendra për komunikime civile.
Në një prej ndërmarrjeve më të mëdha shtetërore nuk ka pasur revizion që nga viti 2007, thanë nga Qendra për komunikime civile. Shtojnë se 145 ndërmarrje të këtilla në vend, kanë të ardhura të përgjithshme prej 800 milionë eurove në vit ndërsa në BPV marrin pjesë mbi 7% dhe punësojnë rreth 30 mijë njerëz. Hulumtimet kanë treguar se kompanitë në përmasa të mëdha e ndjejnë barrën e korrupsionit dhe të njëjtin nuk e marrin me seriozitet të mjaftueshëm.
Ata ndjejnë se nuk kanë fuqi për t’i ndryshuar punët. Pikërisht situata e këtillë kërkon që në të ardhmen të krijohet klimë biznesi pa prangat e korrupsionit, thanë njohësit e ekonomisë.