Korridorin 8 do ta ndërtojë kompania Bechtel-Enka. Këtë e bëri të ditur zv/kryeministri i parë Artan Grubi në Click Plus të TV21. Të premten Grubi do të ketë takim me kryetarin e kompanisë Bechtel-Enka, bashkë me ministrin e Financave dhe të Transportit dhe Lidhjeve. Grubi shtoi se do të propozojnë ligj në Kuvend për mbështetje të këtij projekti kapital.
“Me Bechtel takohemi ditën e premte, po shpresoj se brenda javës së ardhshme t’i përshpejtojmë procedurat për nënshkrimin e memorandum bashkëpunimit dhe të propozojmë ligj në Kuvend. Këtu e sfidoj publikisht opozitën edhe shqiptare edhe maqedonase që t’i japin mbështetje projektit të partneriteti strategjik me kompaninë amerikane Bechtel për ndërtimin e Koridorit 8.”, tha Grubi.
Sipas premtimeve të Bechtel-Enka, korridori 8 do të jetë gati deri në vitin 2024, siç tha zëvendëskryeministri me “çelësa në dorë”. Kurse drejtori i NP “Rrugët e Maqedonisë”, Ejup Rrustemi jep edhe 1 vit hapësirë për ndërtim të korridorit.
“Besojmë dhe jemi të sigurt dhe të bindur se deri në fund të vitit 2025, do të kemi Tetovë, Gostivar dhe gjithë korridorin 8 komplet si autostradë.”, deklaroi Rustemi.
Korridori 8 është një aks komunikacioni që duhet të përfshijë lidhjen mes Maqedonisë së Veriut, Bullgarisë dhe Shqipërisë. Bullgaria dhe Maqedonia e Veriut kështu do të kenë qasje më të madhe në perëndim, ndërsa Shqipëria ashtu si vendet e tjera shpreson për rritje ekonomike.