“Kodra e Diellit”, me rrugë të shkatërruara, deponi në vend të parkut nacional

Me gropa në çdo cep është e mbushur rruga që të shpien drejt lagjes së vikend shtëpizave në Kodrën e Diellit  në Tetovë. Pamjet tregojnë se në këtë rrugë nuk është investuar prej kohësh, ndërsa rrugët tjera të kësaj lagjeje që është zgjeruar viteve të fundit, kanë mbetur të paasfaltuara. Banorët thonë se ndërtimi i kësaj rruge që është premtuar disa herë gjatë fushatave elektorale, ka mbetur i papërmbushur.

 “Para zgjedhjeve premtime pati plotë, por punë hiq nuk është duke u bërë. Më e keqja është se nga mbeturinat nuk lëvizet , mbeturinat e ndërtimit i hedhin dhe ata duhet të dënohen. Përndryshe  ambienti është shumë i mire, rrugët nuk janë duke u bërë asgjë, sidomos kodra e Diellit është e harruar çdo vit thonë do bëjmë por nuk bëjnë asgjë”.

“Gjendja e rrugës është katastrofë. Turistët kur e shohin këtë nuk vijnë.  Unë habitem me njerëzit se kanë vetura të mira dhe i sjellin këndej. Ne jemi mbledh do shokë dhe  do protestojmë në qendër  pasi që është turp një vend turist si ky të lihet pas dore  në këtë gjendje edhe na qeshin të gjithë ”.

Nga Komuna e Tetovës thonë se projekti për rrugën në  lagjen e “vikend shtëpizave” është në fazën përfundimtare.

 “Sa i përket çështjes së “Kodrës së Diellit”, tashmë ka një projekt edhe është në fazën përfundimtare të dokumentacionit, ndërsa  është bërë projekt për vendosjen e kontonjerëve të rinj dhe mekanizmave për pastrimin e të njëjtëve, këtë projekt do ta realizon NPK- Tetova me mjete të bankës botërore”, thonë nga Komuna e Tetovës.

Nga ana tjetër, nga iniciativa “Ta shpëtojmë Kodrën e Diellit” thonë se komuna nuk e realizon projektin për shkak se është e fokusuar me investime vetëm në ato pjesë të qytetit ku merr vota.

 “Ekziston projekt adekuat për atë rrugë dhe komuna e Tetovës duhet të thirret në atë projekt dhe të bën realizimin e saj  dhe për atë ata arsyetohen se nuk kanë votues dhe nuk mund të bëjnë një investim të tillë   dhe investimet bëhen në vende ku duhet të marrin vota  dhe në qytet nuk i bëjnë ku marrin vota”, deklaroi Hamdi Sulejmani nga iniciativa “Ta shpëtojmë Kodrën e Diellit”.

Krahas problemit me rrugën që të shpien në vendet me të bukura të Malit Sharr është krijuar edhe një deponi ku janë grumbulluar mbeturina të ndryshme.