“Klub nate” para Qeverisë, muzikantët dhe hotelierët kërkojnë takim me Zaevin të premten

TË FUNDIT

Duke lëshuar muzikë nga një klub i improvizuar nate para Qeverisë, qindra muzikantë dhe hotelierë dolën në protestë të qetë, duke kërkuar nga përfaqësuesit e Qeverisë t’i rishqyrtojnë protokollet për punën e tyre, sepse siç thonë, pikërisht ata kanë qenë më të prekur nga korona-kriza.

Kërkuan edhe mbështetje më të madhe për bizneset e tyre.


“Ne kërkuam takim urgjent me përfaqësuesit e pushtetit. Ishte një kërkesë me nënshkrim dhe vulë nga më shumë klube të natës, por ende nuk kemi marrë asnjë përgjigje. Prandaj, tani u mblodhëm këtu që të kërkojmë takim ku do t’i paraqesim kërkesat tona, e ato janë: sjellje urgjente e një pakoje masash financiare në formë të granteve me të cilën do t’i servisojmë borxhet tona që u krijuan gjatë periudhës së kaluar dhe miratim i përbashkët i protokolleve, sipas të cilave do të punonim dhe dalëngadalë ta kthenim situatën në normalë”, deklaroi Goran Arsovski – Përfaqësues i Klubeve të natës. 

Edhe punëtorët e dasmave kërkojnë sa më shpejt që është e mundur të sillet protokoll për dasma dhe festa familjare. 


“Protokolli në vendet fqinje parashohin distancë, kushte të mëdha sanitare dhe higjienike, numër të reduktuar të mysafirëve në tavolinë, është lejuar të ketë performanca muzikore, kurse numri i mysafirëve përcaktohet në pajtueshmëri me kapacitetin. Asnjë çift martesor nuk ka vendosur sot që të bëjë dasmë nesër me 200 të ftuar”, u shpreh Ekrem Mimishi – Përfaqësues i punëtorëve të dasmave.

Puna e klubeve të natës ishte ndërprerë më 14 mars të këtij viti, me dispozitë qeveritare me fuqi të ligjit, kurse derisa nuk punonim nuk kanë marrë asnjë mbështetje financiare nga shteti. 

Vetëm me pakon e parë ekonomik morën ndihmë prej 14.500 denarëve për pagesë të rrogave të të punësuarve të tyre, por vetëm për muajt prill, maj dhe qershor. Pas kërkesës së organizatorëve – brenda dy ditëve të takohen me kryeministrin, nga Qeveria u përgjigjën se nga Kabineti i Zaevit i kanë ftuar për takim të premten. Ndryshe, në seancën qeveritare që u mbajt të dielën, janë sjellë vendime të ndalohen muzikantët, grupet muzikore dhe DJ në objektet hotelierike, është kufizuar zhurma brenda lokalit, pastaj në një tavolinë mund të ulen vetëm nga 4 persona, kurse tërësisht është ndaluar puna e klubeve të natës dhe diskotekave.

error: Content is protected !!