Kjo është vetura më e shtrenjtë në botë! U shit nga Mercedes me çmim marramendës

TË FUNDIT

Mercedes-Benz konfirmoi se së fundmi ka shitur makinën më të shtrenjtë në botë.

Një coupe shumë e rrallë Mercedes-Benz SLR e vitit 1955, që mbahej në koleksionin e autoprodhuesit gjerman, iu shit një pronari privat për 135 milionë euro. Ky çmim e bën atë makinën më të shtrenjtë që është shitur ndonjëherë, sipas Hagerty, një kompani që gjurmon vlerat e makinave koleksioniste.

Paratë nga shitja do të përdoren për të krijuar Fondin Mercedes-Benz, një fond global i bursave, bëri të ditur Mercedesi në një njoftim.

Çmimi i mëparshëm rekord i shitjes për një makinë thuhet se ishte 70 milionë dollarë i paguar në vitin 2018 për një Ferrari 250 GTO të vitit 1963.

Mercedesi që u shit ishte një nga dy prototipet e vetme 300 SLR Uhlenhaut Coupe. Makinat 67-vjeçare u emërua për inxhinierin kryesor të Mercedesit në atë kohë, Rudolf Uhlenhaut, dhe pretendohet se kishte një shpejtësi maksimale prej 186 mph. Ajo u shit në një ankand të mbyllur vetëm me ftesë në Muzeun Mercedes-Benz në Shtutgart, më 5 maj. Ankandi u mbajt në bashkëpunim me kompaninë e ankandeve të automobilave “RM Sotheby’s”.

Sipas një deklarate të Mercedes-Benz, makina tjetër Uhlenhaut Coupe do të mbetet në koleksionin e Muzeut.