Kishat e hapura në Shkup, por të zbrazëta

Kisha “Shën Klimenti” i Ohrit në Shkup dyert i kishte të hapura. Në oborrin e saj po punohej. Po kositej bari e mbilleshin lule.

Përgatitjet po bëhen në ditë festeje, kur në këtë kishë duhej të mbahej liturgjia për “Ditën e Shpirtrave”, kurse nesër do të shënohet “Dita e Ditëlindjes së Kishës Ortodokse”.

Edhe pse liturgji nuk kishte, prifti ishte aty. Para kamerës së TV21 ai tregoi rëndësinë e kësaj feste. Festa në fakt është nesër, në ditën e 50 të ringjalljes së Krishtit e cila është karakteristikë për fenë ortodokse. Krishti ringjallet kur do të vijë për herë të dytë, për orën dhe ditën nuk dihet, sqaron prifti i kishës “Shën Klimenti i Ohrit”

“Për këtë kjo festë është e rëndësishme. Zbret shpirti i shenjtë dhe e hap mbretërinë e zotërave për të gjithë besimtarët, të gjithë ata që do të shpëtojnë duhet të hynë mbretërinë e Zotit. Ne tashmë kemi njerëz të vdekur, të afërm, miq, të cilët tashmë gjenden lartë në qiell. Qëllimi ynë është të lutemi për shpirtrat e tyre. Për këtë, kisha e tokës lutet për kishën qiellore. E shtuna është “Dita e shpirtrave” ku ne lutemi për të vdekurit, dhe kjo është ndër ditët e vetme kur të gjithë besimtarët shkojnë në varreza”, tha prifti, Sashko Nikollovski.

Kisha ishte e zbrazët edhe prej brenda, sepse besimtarët nuk mund të jenë të pranishëm aty për shkak të orës policore e cila është në fuqi në territorin e Shkupit. E kjo i ka revoltuar ata, tregon prifti.

“Duhet të tregoj, se besimtarët janë shumë të revoltuar. Ditëve paraprake kanë ardhur dhe ishin shumë, shumë të revoltuar sepse e gjitha kjo si të përgatitet për besimtarët ortodoks. Pak duhej të mendohej në atë temë. Ne nuk duam t’i revoltojmë, provojmë t’i qetësojmë. E dimë seriozitetin e situatës, edhe pse kisha nuk është shkaktare. Dihet kush është shkaktare. Dihen shkaqet edhe aty le të gjenden. Kisha nuk është ajo. Por ka pasur mënyra se si edhe kjo të kalohet”, deklaroi më tej Nikollovski.

Prifti propozoi që rituali të ishte bërë në kisha, duke respektuar distancën, pasi edhe ashtu më shumë se 10 besimtarë nuk lejohen brenda kishës. Qetësi edhe në varrezat më të mëdha në Shkup ato të Butelit. Dyert ishin të mbyllura dhe nuk kishte besimtarë në to. Zbrazët ishte edhe në kishën “Bogorodica”.

Por në këto gjendje nuk ishin edhe kishat jashtë Shkupit. Në Gostivar ku ora policore nuk është 80 orëshe, por fillon nga ora 16 dhe përfundon në ora 5 të ditës së nesërme, besimtarët përveç kishave, vizitonin edhe varrezat.

Thirrje publike për të marrë pjesë në kisha gjatë kësaj feste kishte bërë edhe peshkopi Agatangel. Për këtë thirrje Prokuroria Publike në Veles ka hapur procedurë “me të dëgjuar”, pasi siç thuhet në njoftimin e Prokurorisë, thirrja për tubim ka ardhur në kohë të pandemisë.