Kryeministri Zoran Zaev nuk ka asgjë kundër që pakica bullgare në Maqedoninë e Veriut të figurojë edhe në Kushtetutën e vendit. Kjo madje sipas tij mund të vlejë edhe për pakicat e tjera që jetojnë në shtet, e të bëhet në momentin kur të hapet Kushtetuta në prag të aderimit në Bashkimin Evropian.
“Ne nuk kemi asnjë lloj paragjykimi. Nëse dikush kërkon që nesër ta bëjmë këtë, edhe po të duam nuk mundemi, nuk i kemi 2/3-tat e as që duhen, por e themi publikisht, sepse edhe bullgarët, kroatët, malazezët, egjiptianët, edhe shumë bashkësi të tjera etnike do të jenë në Kushtetutën tonë në prag të aderimit në Bashkimin Evropian”, tha Zaev.
Po Bullgaria si vend anëtar i BE-së, a nuk duhej ta bënte, ose ta bëjë në të ardhmen këtë gjë me pakicën maqedonase që jeton atje? I pyetur rreth kësaj çështjeje, Zaev thotë se nuk dëshiron të përzihet në punët e shteteve të tjera.
“Kjo është e drejtë e Bullgarisë. Unë nuk do të doja… çdo herë është bukur të ketë reciprocitet, por përzierja në punët e brendshme në shtete fqinje nuk është mesazh për miqësi, u mbetet atyre, unë e them si nevojë e jona, jo sepse kërkon Bullgaria”, shtoi Zaev.
Po për dallim nga Zaev, që thotë se nuk ndërhyn në çështjet e fqinjëve, pala bullgare nuk heziton ta bëjë këtë gjë në asnjë moment. Ndër deklaratat e fundit është ajo e ministrit teknik për punë të jashtme, sipas të cilit, ndryshimi i kushtetutës së Maqedonisë së Veriut është një prej mënyrave për zgjidhje të problemit të komunitetit bullgar në Maqedoni.
“Nëse e shihni Kushtetutën e RMV-së pas vitit 2001, aty bullgarët, si popull që jetojnë në territorin e tanishëm të shtetit, nuk figurojnë. Ka serbë, ka shqiptarë, ka romë, ka turq, boshnjakë, por nuk ka bullgarë”, deklaroi Svetllan Stoev, ministër teknik për Punë të Jashtme të Bullgarisë.
Në Bullgari mohohet ekzistenca e ndonjë pakice maqedonase. Ish-kryeministri Bojko Borisov, në nëntor të vitit të kaluar pat deklaruar se “në Bullgari nuk ka pakicë maqedonase”. Sa i përket pakicës bullgare në Maqedoni, në fillim nuk dihej se kjo do të ishte kërkesë e fqinjit lindor. Në mars 2020 Presidenti i vendit Stevo Pendarovski, por edhe nga Qeveria, patën dalë më qëndrim se nuk ka nevojë për ndryshim të Kushtetutës për t’i bërë bullgarët pjesë përbërëse të saj dhe se nuk kishte ndonjë kërkesë të tillë në bisedimet me Sofjen. Ky reagim pat ardhur si reagim ndaj Ministrit të Jashtëm Bujar Osmani i cili pat deklaruar se nuk ka asnjë kundër që bullgarët të shkruhen si bashkësi etnike në Kushtetutë.