Kërçovë, votimi u zhvillua pa probleme, 2 persona refuzuan, njëri ishte transferuar në spital

Ora 9 e mëngjesit, ekipi mjekësor dhe anëtarët e Komisionit Komunal në Kërçovë po përgatiten për të dal në terren që të votojnë të infektuarit me Covid-19 dhe të izoluarit.

Veshën veshjet mbrojtëse vendosën maskat dhe të gjitha mjetet mbrojtëse.

Mjeku Besim Zeqiri tha se i kanë marrë të gjitha masat e duhura që të minimizojnë rrezikun.

“Ne i kemi marrë të gjitha masat mbrojtëse dhe tani po nisemi për të vizituar familjet që janë në izolim dhe të infektuar që të mund ta realizojnë të drejtën për të votuar. (Ngjitje) Jemi munduar rrezikun ta minimizojmë duke marrë masa mbrojtëse, atje do të respektojmë distancën, do të përdorim mjete dezinfektuese, maska mbrojtëse, skafanderët dhe të gjitha masat tjera që janë paraparë për mbrojtje”, deklaroi Besim Zeqiri, mjek.

Morën kutinë e votimit dhe u nisën në terren.

Pasi arritën, ata fillimisht personave që votonin ua dezinfektonin duart, dhe u kërkonin letërnjoftimin. Ua kontrollonin gishtin me llambën UV dhe më pas e spërkasnin gishtin.

Pas procedurës së votimit, fleta votuese  fillimisht futej  në zarf më pas në kuti, dhe sërish dezinfektoheshin personat që kanë votuar.

“Komisioni e zbaton si duhet procedurën, e pat edhe vetë, është gjithçka e mbrojtur edhe ne edhe ju nuk ka këtu për çka të dyshohet”, tha një votues.

Ekipi mjekësor dhe anëtarët e Komisionit pasi largoheshin nga shtëpitë e votueseve, hiqnin veshjet mbrojtëse, dezinfektoheshin dhe vishnin veshje tjera të pastra mbrojtëse.

Kishte edhe nga ata persona që ishin paraqitur për të votuar, por pasi panë ekipin mjekësor dhe ekipin e Komisionit të veshur me veshje mbrojtëse refuzuan të votonin. Sipas tyre nuk kishte nevojë për këto lloj masa.

Kryetarja e Komisionit Komunal Zgjedhorë në Kërçovë  Antigona Seferi tha se procesi i votimit u zhvillua pa pengesa.

“Procesi zgjedhorë për personat në izolim dhe ata të infektuar me Covid-19 përfundoi në orën 11:30 dhe u zhvillua pa probleme.

Gjithsej kemi të paraqitur 35 persona nga të cilët dy refuzuan të votojnë ndërsa njëri ishte në spital”, theksoi Antigona Seferi, Kryetare e KKQ-Kërçovë.

Nesër do të votojnë personat me sëmundje kronike. Në Kërçovë për votim gjatë ditës së nesërme janë paraqitur 483 persona për të votuar në kushte shtëpiake.