Kërçovë, tregu i gjelbër “i vdekur”, shitësit ankohen se s’ka punë, shpëtimin e shohin tek mërgimtarët

Tezga të mbyllura dhe shumë pak blerës!

Kjo është gjendja e cila mbizotëron në Tregun e Gjelbër në qytetin e Kërçovës.

Shitësit ankohen se janë në situatë të vështirë, ata nuk arrijnë t’i paguajnë as tatimet.

Ata shpresat i kanë tek ardhja e mërgimtarëve në Kërçovë.

Shitësit thonë se nëse nuk vinë mërgimtarët vështirë se do të mund ta përballojnë këtë situatë.

 “Janë të mbyllura ketë periudhë sepse kishim sanksione për shkak të koronës, nuk kanë ardhur  as mërgimtarët për shkak të koronës nuk ka asgjë dhe nuk mund ti plotësojmë tatimet bazë. Nuk mund t’i paguajmë tatimet për atë edhe janë të mbyllura. Ja xhironi lartë-poshtë nuk punojnë, këtu jemi 4-5 shitës”, tha një shitës.

 “Çdo ditë është kështu, nuk ka njerëz nuk ka asgjë, nuk ka shitje. Si i hapim ashtu i mbyllim, si vijmë ashtu edhe shkojmë”, u shpreh një shitës tjetër.

E njëjta situatë është edhe me shitësit e pemëve dhe perimeve. Ata thonë se me vite punojnë në tregun e gjelbër të Kërçovës por kaq të boshatisur nuk mbajnë mend.

 “Punë ka sipas situatës edhe puna është më dobët se ne kemi menduar se do të vinë mërgimtarët, ata nuk vinë për shkak të Covid-19, janë frikësuar pak njerëzit edhe për atë arsye nuk vinë. Kërçova është qytet sezonal që punon me mërgimtarët, nëse nuk vinë ata këtu do të jetë vështirë”, theksoi një shitës tjetër.

 “Ka punë çdo ditë por jo shumë së tepërmi. Tash presim mërgatën  nëse i lejojnë me këtë punën e karantinës nuk di si është gjendja. Në qoftë se vinë do të ketë punë, nëse jo situata do të jetë e njëjtë”, potencoi një shitës.

Tregjet nuk kanë punuar për një periudhë për shkak të pandemisë me Covid-19. Por edhe pse tani janë hapur ata hasin në vështirësi të mëdha, sepse siç thonë puna ka rënë në mënyrë drastike.