Që nga janari i këtij viti zëvendëskryeministri i parë Artan Grubi tha se procesi i si sistematizimit të administratorëve do të kryhet shpejt, por kanë kaluar më shumë se 7 muaj e jo të gjithë administratorët janë sistematizuar. 92% e të paraparëve me planin për shpërndarje, tashmë janë në vendet e tyre të punës, thotë Grubi.
“92% të të gjithë administratorëve të paraparë me planin për shpërndarje, tashmë janë shpërndarë duke përfshirë edhe ata që ishin kontestues në Inspektoratin Shtetëror të Tregut. Nga java e kaluar tashmë kanë filluar që të gjithë në punë. Jemi në proces të transferimit të fundit të personave në Ministrinë e Punëve të Brendshme, 140 prej tyre të cilët për momentin janë duke kaluar vetingun në Agjencinë për Siguri Kombëtare”, tha Grubi.
Grubi thotë se nuk ka pasur ankesa nga administratorët për sistemimin e tyre.
“Tek unë sa e di nuk ka pasur ankesa, ka pasur ca dilema procedurale p.sh një grup i Kumanovës i cili ishte transferuar tek Drejtoria e Tatimeve ishte vendosur në Shtip, por Shtipi e mbulon qytetin e Kumanovës si rajon dhe ishte vetëm çështje teknike e marrjes së dokumentacionit”.
Procesi i shpërndarjes së nëpunësve shtetërorë ka nisur muaj më parë, pasi u soll ligj në Kuvend për rishpërndarjen e të punësuarve sipas programit K5. Nga 1349 administratorët, që merrnin rroga por nuk shkonin në punë, 1180 e firmosën vendimin e shpërndarjes, 135 nuk u paraqitur fare të nënshkruajnë, ndërsa 26 refuzuan të nënshkruajnë vendimet e reja të punës.