Rezultatet e dobëta në ciklin zgjedhor dhe mos pjesëmarrja e VMRO – DPMNE-së në çështjet kyçe, janë arsye të mjaftueshme për të tu larguar nga pozita e kryetarit të VMRO-DPMNE-së, Hristijan Mickoski. Kryetari i Kavadarit përmes profilit të tij të Facebook-ut bëri thirrje për protestë të qetë për dorëheqjen e kryetarit të VMRO-DPMNE-së, Hristijan Mickoski.
“Mendoj se është koha që VMRO-DPMNE-ja të kërkojë udhëheqësi të re e cila do ta çojë partinë në rrugën e drejtë, udhëheqësi e cila do ta çojë VMRO-DPMNE-në që të marrë pjesë në sjelljen e vendimeve për këtë shtet. Për fat të keq VMRO-DPMNE i humbi zgjedhjet parlamentare, nuk fitoi siç priste, edhe Mickoski nuk e mbajti fjalën që të japë dorëheqje dhe ta lirojë partinë, të konsolidohet dhe partia të mundë të arrijë rezultate ashtu siç meriton si parti më e madhe në shtetin tonë”, theksoi Mitko Jançev – Kryetar i Kavadarit.
Jançev ka vërejtje në lidhje me udhëheqësinë e partisë për të cilën siç thotë se secili që nuk mendon si ai, do të ballafaqohet me degradim dhe nënçmim. Ai shtoi se duhet të ndërpritet praktika që lideri i partisë të zgjidhet ose të emërohet nga ana e një grupi të vogël njerëzish dhe të punojë për interesat e tyre. Jançev mendon se lideri i VMRO-DPMNE-së duhet të zgjidhet me votim të anëtarësisë së plotë. Thirrjes për protestë iu përgjigj opozita.
“U tregua se Mitko Jançev është ylli më i madh në estradën e Maqedonisë. Për fat të keq ai u proklamua si politikan i cili merret me politikë por në fakt ai është pjesë e estradës në Maqedoni. Tashmë dihet me kë po merret vesh, vetë ai pranoi me kë e ka festuar emërimin për nënkryetar të partisë para 2,5 viteve, kështu që normalisht se është nën komandë të Zoran Zaevit”, deklaroi Dimçe Arsovski – zëdhënës i VMRO-DPMNE-së.
Në ndërkohë Jançev pas konsultimeve me Ministrinë e shëndetësisë dhe Komisionin për sëmundje ngjitëse e anuloi protestën për shkak të pandemisë Covid-19. Ai theksoi se vendimi nuk do të thotë që po heq dorë nga qëllimi, por përkundrazi porositi se Mickoski duhet ta lë partinë të punojë dhe të mos i mundësojë më Zoran Zaev-it dhe LSDM-së të punojnë kundër interesave shtetërore.