Hekurudha me Bullgarinë sërish në qorrsokak. Përplasje politike në relacionin Shkup-Sofje. Deklaratës së ministrit bullgar të transportit Grozdan Karaxhov se “Korridori 8 varet nga dëshira dhe vullneti politik i Republikës së Maqedonisë së Veriut”, Ministria jonë e Transportit iu përgjigj me “tjetër janë veprat, e tjetër fjalët”. Pretendojnë se Bullgaria po shtrembëron faktet.
“Pas disa kërkesave dhe përpjekjeve nga ana jonë për organizimin e takimit të përbashkët të grupeve të punës, nuk ka pasur përgjigje zyrtare nga Republika e Bullgarisë për të organizuar ndonjë takim dhe për të arritur marrëveshje për realizimin e këtij korridori të rëndësishëm evropian. Gjithashtu, takimi i planifikuar më parë ndërmjet drejtorëve të dy kompanive hekurudhore është anuluar nga drejtori i Hekurudhave Bullgare”, thotë ministria e Transportit.
Drejtori i Hekurudha-Infrastrukturë, Sinisha Ivanovski, tha për TV21 se pas disa takimeve tashmë kanë arritur pajtueshmëri në parim me kolegët bullgarë se si të zgjidhet problemi i tunelit – me shpime të përbashkëta nga të dyja palët përmes një kompanie të vetme. Por takimi i fundit, i planifikuar për në gjysmën e dytë të nëntorit të vitit të kaluar, nuk u mbajt.
“Së paku 5-6 fesave edhe përkrah asaj që është dakorduar bashkë dhe para gjithë bankave dhe para të gjithëve dhe para BE-së, nuk erdhën, nuk iu përgjigjën asnjë e-maili, që ne edhe më tej i dërgojmë ato shkresa, megjithatë pjesa teknike infrastrukturore e Republikës së Bullgarisë ngadalë sikur po tërhiqet nga dialogu teknik dhe po i lë pozitë dominuese dialogut politik”, tha Sinisha Ivanovski.
Deklarata e Karaxhov vjen pasi që qeveria bullgare vendosi më parë të ndalojë përkohësisht ndërtimin e hekurudhës për në Maqedoni dhe të riorientojë paratë. Karaxhov tani ka deklaruar se Bullgaria është e gatshme të nënshkruajë marrëveshje me Maqedoninë dhe të fillojë ndërtimin e tunelit hekurudhor ndërkufitar përgjatë Korridorit 8. Ai pretendon se ka draft-marrëveshje me Maqedoninë për tunelin, por se që tre muaj nuk është miratuar nga pala maqedonase. Megjithatë, pala jonë mohon të ketë ndonjë marrëveshje. Linja hekurudhore Sofje-Shkup është pjesë e Korridorit 8, që duhet të lidh Detin e Zi me atë Adriatik. Përndryshe hekurudha me Bullgarinë po ndërtohet me dekada dhe është pjesë e programeve të të gjithë qeverive të deritanishme.