Pagesa e rrogave për muajt tetor, nëntor dhe dhjetor, ndihma e re qeveritare për përkrahje të vendeve të punës, rrogat e të punësuarve në ekonomi. Qeveria do të injektojë 70 milionë euro në ekonominë dhe kompanitë. Zgjidhja e propozuar nga ana e Ministrisë së Financave dje u miratua në Qeveri. Hapi i ardhshëm do të jetë miratimi i kësaj zgjidhjeje në Kuvend. Kjo do të jetë mundësi që kompanitë që kanë të ardhura të reduktuara me mbi 80%, të mund të aplikojnë për përkrahje financiare deri në 21.776 denarë, ndërsa kompanitë me të ardhura të reduktuara deri në 30 ose 40% do të marrin përkrahje prej 14.500 denarëve për çdo të punësuar.
“Likuiditeti i Buxhetit është në gjendje që t’i paguajë të gjitha obligimet që i ka Qeveria ndaj të gjithë shfrytëzuesve buxhetore…Qytetarët nuk duhet të brengosen, e as kompanitë në lidhje me pagesat”, deklaroi Dimitar Kovaçevski – zëvendës ministër i Financave.
Punëdhënësit do të mund të aplikojnë për ndihmë financiare deri më datën 7 të muajit për muajin paraprak. Shfrytëzues mund të jenë kompanitë që kanë të paktën 30% rënie të të ardhurave në periudhën prill-tetor 2020. Nga Organizata e Punëdhënësve reagojnë, duke kërkuar që ndihma të jetë e njëjtë për të gjithë.
“Kur bëhet fjalë për ndihmë nga shteti, mendoj se ajo gjithmonë duhet të jetë e drejtë dhe e barabartë për të gjithë. Të mos jetë sipas parimit “kush vjen i pari, shërbehet i pari”, por të shihet me sa mjete disponon shteti”, deklaroi Angel Dimitrov- kryetar i organizatës së punëdhënësve.
Ditëve të fundit edhe Banka Botërore paralajmëroi se masat e Qeverisë duhet të kenë qëllim.
“Intervenimet e Qeverisë janë më se të nevojshme për momentin dhe duhet të kenë një qëllim, sidomos duhet t’i kenë parasysh kategoritë më të rrezikuara”, deklaroi Masimiliano Paoluçi –
shef i zyrës së bankës botërore.
Ndryshe, sipas propozimit, kompanitë të cilat kanë aplikuar nuk mund të paguajnë dividendë dhe shpërblime deri në ditën e pagesës së rrogës për muajin dhjetor.
Punëdhënësit që shfrytëzojnë mbështetjen financiare, nuk guxojnë ta reduktojnë numrin e të punësuarve dy muaj pas kalimit të muajit për të cilin është shfrytëzuar ndihma, përfundimisht deri në shkurt të vitit 2021, përveç në rast pensioni ose diçka të ngjashme. Në qoftë se punëdhënësi punëtorëve u paguan rroga më të ulëta, janë paraparë edhe gjoba deri në 10 mijë euro, varësisht nga ajo sa i madh është subjekti juridik.