Industria e eventeve në protestë! Nga Qeveria kërkojnë grante, e jo konkurse

Mariani këtë aparaturë zërimi zakonisht e përdor për ngjarje të ndryshme, por sot po i shërben për të ngritur zërin përballë Qeverisë.

 “Arritëm të bëjmë brend nga Maqedonia, nëse mund të shihni dhe incizoni, në kuti shkruan “prodhuar në Maqedoninë e Veriut”, në vend se Qeveria të mbështesë kompani të këtilla ne luftojmë që të mos t’ia vëmë drynin derës. Pajisjet rrinë, nuk punojnë!”, tha Marian Millosheviq – MM Acoustics.

Ata që merren me ndriçimin, skenat, organizimin e mitingjeve, koncerteve e ngjarjeve sportive thonë se industria e tyre është e rrezikuar nga pandemia, andaj kërkojnë ndihmë.

Përfaqësuesja e tyre, Maja Babiç, duke parë shifrat alarmante nga pandemia, është e vetëdijshme që me punë nuk mund të fillojnë, andaj kërkojnë grante nga Qeveria, e jo konkurs për organizim të ngjarjeve shtetërore, por Qeveria nuk po na e vë veshin, shprehet ajo.

 “Ua arsyetuam gjithë këtë, të them të drejtën e kuptuan drejtë se jemi ndër industritë më të rrezikuara por edhe përkundër gjitha kërkesave tona, ata thjesht bënë një model të tyrin që quhet “konkurs” për organizim të ngjarjeve shtetërore, ku as nuk e  dimë  se kur do të dalë, as kush do të mund të aplikojë, as kush do të zgjidhet dhe me çfarë kriteresh, e ajo që e dimë me siguri është se nuk do të mund të marrin të gjitha kompanitë dhe në fund të ditës ata duhet ta quajmë ndryshe, ajo nuk është ndihmë por pagesë për shërbimet tona që do të organizojmë ngjarjet shtetërore”, u shpreh Maja Babiç – Kryetare e IVAP.

Babiç pohon se për gjetjen e një zgjidhjeje kanë komunikuar me zëvendëskryeministrin për çështje ekonomike, Fatmir Bytyqin, por nuk kanë arritur në ndonjë kompromis. Për TV21 nga kabineti i zv/kryeministrit,  thonë se në pakon e 5-të të masave ekonomike kanë krijuar pako për mbështetje direkte për industrinë e eventeve, që është masë shtesë.

 “Siguruam 1 milion euro mjete financiare të pakthyeshme për organizimin e të paktën 40 ngjarjeve, për realizimin e së cilave presim që të angazhohen 100 kompani si organizues dhe nënkontraktues dhe qiramarrës së pajisjeve por edhe angazhimin e interpretuesve, artistëve, muzikantëve, artistëve, punonjësve të kulturës, fotografëve, kameramanëve, producentëve, teknikëve dhe profesioneve të tjera që zakonisht merren me dhe rreth industrisë së eventeve”, deklaroi Fatmir Bytyqi – zëvendëskryeministër për Çështje Ekonomike.

Thirrja publike do të hapet në fillim të majit, tregojnë nga Qeveria, pas çka do të sigurohen grante për aplikuesit që do t’i përmbushin kushtet, ndërsa nga qershori e deri në fund të shtatorit Qeveria pret realizimin e dhjetëra ngjarjeve mbi temën e “30 vjet Pavarësi”. Sqarojnë në fund se Qeveria do të ketë aktivitetet e saj zyrtare nga buxhet i veçantë, kurse masa për industrinë e eventeve është posaçërisht për ta që të punojnë e të kenë veprimtari ekonomike.