Industria e bukës kërcënon: Nëse çmimi ngrin në 33 denarë, nuk do të ketë bukë në treg

“Në Qeveri, e cila kujdeset për qytetarët presione të tilla nuk kalojnë.”
Kështu u shpreh ministri Bekteshi ditën kur njoftoi se çmimi i bukës do të ngrijë në 33 denarë. E pikërisht sot nga industria e bukës dolën me kundërpërgjigje.
https://www.youtube.com/watch?v=nIHebhrjNmQ
“Kështu që sot u soll vendim nga të gjithë njëzëri bashkë edhe me odat tjera që ishin prezent se ditën kur do të del vendimi për ngrirjen e çmimit në gazetën zyrtare nga dita e ardhshme nuk do të prodhohet bukë dhe nuk do të furnizohet tregu.”- tha Goran Malishiq, Kryetar i Shoqatës së Fabrikave të Bukës.
Thonë se me masën për subvencionimin e rrymës elektrike çmimi i bukës nuk ka pësuar rritje siç do të pësonte pa këtë masë prandaj vlerësojnë se kjo ka dhënë rezultatin që duhej, ndërsa shtojnë se ngrirja e çmimit çon në mbylljen e fabrikave të bukës.
“Duhet thjeshtë të bisedohet, të shihet parametrat reale sepse më besoni njëzëri tani prodhuesit më të mëdhenj në Maqedoni vërtetuan dhe thanë se do të mbyllen.”- pohoi Goran Malishiq, Kryetar i Shoqatës së Fabrikave të Bukës .
Megjithatë, Ministri i Ekonomisë Kreshnik Bekteshi paralajmëroi se veç çmimit të bukës do të ketë edhe ngrirje në produktet tjera ushqimore.
“Do ta përsëris edhe njëherë, ky është vetëm hapi i parë. Do të pasojnë vendime adekuate edhe për produktet tjera, nuk do të lejojmë qytetarët të paguajnë çmime më të larta nga ajo që është reale, veçanërisht për produktet ushqimore bazë. Presione, paralajmërime se do të mbyllen nuk do të mbyllen mund të bëjnë në ndonjë vend tjetër.”- deklaroi Kreshnik Bekteshi, Ministër I Ekonomisë.
Përndryshe, sipas asaj që tha të shtunën ministri e vetmja çështje që do të shqyrtohet nesër është fakti se kur mund të hyjë në fuqi vendimi për ngrirjen e çmimit të bukës, më 1 mars apo 1 prill.