“Ilindeni i rëndësishëm edhe për Bullgarinë”, Xhaferi, Zaevi dhe Osmani me mesazhe drejt Sofjes

Për dallim nga Presidenti Stevo Pendarovski, i cili theu traditën për të mbajtur fjalim dhe u mjaftua me një video-paraqitje prej 2 minutash, ku foli në terma të përgjithshëm, kryeparlamentari Talat Xhaferi dhe Kryeministri Zoran Zaev, në 118 vjetorin e shënimit të Ilindenit, nuk lan pa e përmendur kontestin me Bullgarinë. Kryetari i Kuvendit, foli për Rezolutën për “linjat e kuqe” të Maqeodnisë së Veriut në bisedimet me Bullgarinë. Tha se miratimi i saj njëzëri nga deputetët e partive të ndryshme është vërtetimi më i mirë se kemi respekt të dyanshëm dhe se bëjmë betejë të përbashkët për mbajtjen në jetë të ëndrrës së trimave që ndër vite kanë dhënë më të çmuarën.

“Për fat të keq kontesti me Republikën e Bullgarisë e vështirëson hapërimin tonë drejt familjes evropiane, edhe pse jemi dhe ende mbetemi të hapur për dialog të sinqertë, të mësuar nga përvoja jonë shumëvjeçar me një shtet tjetër fqinj se vetëm dialogu i hapur është mënyra e vetme për arritjen e zgjidhjeve të pranueshme për të dyja palët”, tha Xhaferi.

Kryeministri Zoran Zaev në fjalimin e tij në Pelincë theksoi se Maqedonia e Veriut gjatë historisë nuk i ka bërë dëm ndonjërit prej fqinjëve e as nuk ka ndërmend të bëjë diçka të tillë në të ardhmen. Jemi dhe mbetemi në anën e paqe dashjes për zgjidhjen e konflikteve, tha kryeministri, duke treguar më tej bindjen e tij se Sofja nuk do të bëhet pengesë e rrugës evropiane të Shkupit.

“Jam i bindur se Republika e Bullgarisë është mik dhe se është shumë afër dita kur edhe populli maqedonas dhe ai bullgar do të binden se Bullgaria nuk do të jetë pengesë për Maqedoninë e Veriut. Bashkërisht do ta arrijmë këtë sepse nga të dyja anët ka njerëz të mençur dhe të aftë, vizionarë që do të japin shanse dhe do të kuptohen në interes të qytetarëve të tij”, tha Zaevi,

Edhe Ministri për Punë të Jashtme Bujar Osmani, në video-fjalimin e tij, u shpreh se siç u gjet zgjidhje përmes Marrëveshjes së Ohrit dhe atë së Prespës, ngjashëm, edhe përmes implementimit të Marrëveshjes për miqësi, do t’i tejkalohen dallimet me Bullgarinë. 2 gushtin e quajti ditë të rëndësishme si për Maqedoninë po ashtu edhe për Bullgarinë.

“Ilindeni është ditë e rëndësishme edhe për fqinjët tanë në Republikën e Bullgarisë. Për fat të keq, në të kaluarën, e jo rrallë edhe sot, kjo më së shpeshti ka qenë shkak për përçarje dhe mosmarrëveshje, në vend që të jetë pikë e cila do të na bashkojë dhe afrojë. Në kontestin e sotëm bashkëkohor, obligimi ynë është që Ilindenin ta bëjmë pikërisht pikën e cila do të na lidhë, festë e cila do të na bashkojë; ngjarje historike përmes shënimit të së cilës do të tregojmë respekt dhe njohje të ndërsjellë”, deklaroi Osmani.

Krye diplomati Osmani po ashtu përmendi edhe njohjen e bullgarëve si bashkësi që jeton në Maqedoninë e Veriut, gjë për të cilën tha se shprehin vullnet të qartë, në kuptimin shoqëror, ligjor dhe madje kushtetues për t’i siguruar të gjithë ata qytetarë të cilët veten e ndjejnë si pjesë të popullit bullgar, lirshëm ta shprehin këtë vullnet, duke respektuar madje edhe pikëpamjet e tyre të ndryshme ndaj historisë së përbashkët, por sipas Osmanit kjo assesi nuk duhet dhe nuk mund të shndërrohet në imponim ndaj qytetarëve që kanë një perspektivë tjetër për historinë e përbashkët. Përfundoi duke thënë se veçantia e popullit dhe e gjuhës maqedonase paraqesin realitet në çdo kuptim; e maqedonasit, si dhe të gjithë popujt e tjerë, kanë të drejtën e ndjenjave të tyre, të bindjeve dhe pikëpamjeve për ngjarje dhe konteste historike sado që këto të jenë të përbashkëta.