I japin afat 48 orë për takim të ri! Hotelierët kërkojnë që bashkë me Qeverinë ta zgjidhin problemin

Hotelierët ndezin dritën e kuqe. Kërkojnë takim urgjent me Qeverinë, i cili do të jetë i hapur edhe për opinionin publik. Duan që bashkërisht të diskutojnë për sjelljen e masave më të reja kufizuese, sepse siç thonë, këto masa e kanë nxitur edhe më shumë revoltën e tyre. Por, dje kryeministri Zoran Zaev theksoi se duhet të zgjedhim mes përfitimit dhe kënaqësisë.  

“Jemi në dispozicion që së bashku me hotelierët të bisedojmë për këtë temë që të mundemi bashkërisht t’i vlerësojmë pasojat e dëmshme të cilat u janë shkaktuar subjekteve juridike dhe që të mundemi t’u ndihmojmë në mënyrë adekuate. Gjithnjë e kemi bërë këtë përmes dialogut”, u shpreh Zoran Zaev – Kryeministër i Maqedonisë së Veriut.

A do ta zgjidhë Qeveria problemin e hotelierëve përmes një dialogu? Asaj i kanë mbetur edhe 48 orë që t’i përgjigjet kërkesës së tyre për takim.   

“Do të gabojmë nëse në çfarëdo mënyre pajtohemi me deklaratën e djeshme se masat e miratuara nga Qeveria nuk janë të popullarizuara. Masat janë të shkëlqyeshme krahasuar me masat në vendet fqinje dhe vendet-anëtare të Bashkimit Evropian. Konsiderojmë se MASAT E REJA KUFIZUESE që u sollën dje nuk janë të popullarizuara, jo për shkak të tyre, por për shkak të PAPËRGJEGJËSISË SË QEVERISË që menjëherë  me miratimin dhe sjelljen e këtyre masave nuk diskuton dhe nuk miraton mënyra për dëmshpërblim të hotelierëve ose mbështetje dhe ndihmë për t’i kompensuar dëmet që do të vijnë si pasojë e zbatimit të tyre”, thonë nga Oda e Pavarur e Hotelierisë.

Hotelierët ankohen se Qeveria e ka sjellë vendimin e ri pa u konsultuar fare me ta dhe pa biseduar për problemet me të cilat përballen. Theksojnë se dëmet e deritanishme janë tejet të mëdha dhe e kapin vlerën prej 18-22 milionë eurove. Duan të dinë nëse Qeveria e shqyrton mundësinë t’i kompensojë shpenzimet që janë rezultat i masës selektive.  

“Qeveria shmang çfarëdo lloj përgjegjësie dhe obligimi që t’i kompensojë dëmet që janë bërë në sektorin hotelierik. Si rezultat i kësaj, këmbëngul që në çdo formë t’i minimizojë, respektivisht të na detyrojnë të punojmë nën kushte specifike dhe të pakëndshme, duke e rrezikuar punën jo vetëm të sektorit të hotelierisë, por edhe ekzistencën e të gjithë të punësuarve në të gjithë Maqedoninë”, potencoi Zdravko Josifovski – Oda e Pavarur e Hotelierisë.

Por, ata vazhdojnë të jenë optimistë dhe besojnë se Qeveria do të gjejë hapësirë që të takohet me ta. Theksojnë se edhe përkundër masave ekonomike, Qeveria nuk ka informacione të drejtpërdrejta lidhur me atë ku dhe si jepen të hollat, duke shtuar se sektori hotelierik nuk është i përfshirë në mënyrë adekuate me ndihmën financiare qeveritare dhe se janë futur në të njëjtën pako me të gjitha veprimtaritë e tjera.