Turqia po përgatit një strategji të re të mbrojtjes, e cila parashikon planifikim për një luftë të mundshme në shkallë të gjerë, zgjerimin e pranisë ushtarake jashtë vendit, bashkimin e strukturave ushtarake në Libi dhe mundësinë e krijimit të një baze ushtarake turke në Arabinë Saudite, raporton gazeta turke “Hurriyet”.
Sipas gazetës, Ministria turke e Mbrojtjes Kombëtare po harton strategjinë e re me qëllim që forcat e armatosura të jenë të përgatitura për sfidat globale të sigurisë dhe të zgjerojnë praninë e tyre në Afrikë dhe Azi. Qasja e re parasheh gjithashtu zhvillimin e mbështetjes logjistike, linjave të furnizimit dhe marrëveshjeve me vendet pritëse.
Sa i përket Libisë, ku Ankaraja mban marrëdhënie ushtarake si me pjesën lindore, ashtu edhe me atë perëndimore të vendit, po shqyrtohet mundësia e krijimit të një ushtrie të bashkuar me strukturë të përbashkët komanduese. Në takimin e përfaqësuesve të të dyja palëve, të mbajtur në Ankara më 23 tetor, janë diskutuar zgjidhjet e mundshme.
Plani parashikon dy faza: Fillimisht bashkimin ushtarak dhe më pas pajtimin politik. Si një nga mundësitë përmendet që Abdul Hamid Dbeibeh të mbetet kryeministër, ndërsa Khalifa Haftar të emërohet shef i Shtabit të Përgjithshëm.
Një pjesë tjetër e strategjisë së re lidhet me Marrëveshjen e Mbrojtjes së Përbashkët të Mekës, e cila parasheh bashkëpunim mes Turqisë, Arabisë Saudite dhe Pakistanit në industrinë e mbrojtjes, trajnimin ushtarak, prodhimin e përbashkët të armëve, transferimin e teknologjisë dhe shkëmbimin e informacioneve të inteligjencës.
Pas emërimit të gjenerallejtënantit pakistanez në pension, Nauman Mahmood, si sekretari i parë i përgjithshëm më 23 shtator, ka nisur formimi i një selie të përbashkët, në të cilën secili prej tri shteteve do të ketë nga pesë përfaqësues ushtarakë dhe diplomatikë.
Arabia Saudite i ka ofruar Turqisë mundësinë e krijimit të një baze ushtarake në territorin e saj, sipas një modeli të ngjashëm me strukturën ushtarake turke në Katar. Qëllimet do të ishin forcimi i kapaciteteve parandaluese, trajnimi dhe mbështetja këshillimore për ushtarët sauditë, si dhe zhvillimi i kapaciteteve të përbashkëta të mbrojtjes.
Mundësia e krijimit të bazës lidhet me përfundimin e procedurave parlamentare në Turqi dhe marrjen e autorizimeve të nevojshme për dislokimin e trupave ushtarake.
Sipas “Hurriyet”, Uashingtoni e sheh një bashkëpunim të tillë rajonal në fushën e mbrojtjes si një faktor të mundshëm për ruajtjen e ekuilibrit dhe stabilitetit në Lindjen e Mesme. Sipas vlerësimeve në Ankara, gjatë viteve 2027 dhe 2028, SHBA-ja mund ta zvogëlojë angazhimin e drejtpërdrejtë ushtarak në rajon dhe një pjesë më të madhe të përgjegjësive të sigurisë t’ua kalojë partnerëve rajonalë.