Sekretari gjeneral i Lëvizjes Besa, Arjanit Hoxha, është i bindur se lideri i partisë Bilall Kasami do të jetë kryetari i ardhshëm i Tetovës
“Në çdo vend ku ka më shumë se dy kandidatë është e pamundur fitore në raundin e parë, me konstilacionet që janë, andaj nuk flas për raundin e parë, por kur them fitore, flas që në Tetovë Bilall Kasami do të jetë kryetar i ardhshëm i Tetovës”, u shpreh Arjanit Hoxha – Sekretar Gjeneral i Lëvizjes Besa.
Fitoren e presin në rrethin e dytë duke e mposhtur Teuta Arifin nga BDI. Këtë e bazojnë në sondazhet e bëra. Po Hoxha me këtë lë të kuptohet se opozita shqiptare Aleanca-Alternativa nuk do të kalojë në rrethin e dytë. E kryetari i Aleancës për Shqiptarët Ziadin Sela thotë se këtë do ta shohim ditën e zgjedhjeve.
“Nuk kam koment. 17 tetori është aty dhe do ta shohim”, u shpreh Ziadin Sela.
Për sigurinë e Besës në fitoren në Tetovë pyetëm edhe në BDI, por nuk morëm asnjë reagim.
E nga ana tjetër Hoxha garanton se për fitoren e tyre në Tetovë nuk do të ketë intervenim nga LSDM-ja, për shkak se siç thotë, “prishen balancat qeveritare”! Pohon se në raundin e dytë “do të jenë në gjah të votave të LSDM-së”.
“Votuesit e LSDM-së në 2020 për bartës liste e kanë votuar Bilall Kasamin për deputet, cila është arsyeja të mos e votojnë për kryetar komune?!”, shtoi sekretari Gjeneral i Lëvizjes Besa, Arjanit Hoxha
E raundi i parë i zgjedhjeve do të shërbejë për matje forcash mes partive qeverisëse.
“Për të verifikuar potencën tonë politike si subjekt politik, kjo është karshi partnerit të koalicionit. Karshi vetvetes e kemi obligim ta testojmë vetveten për një vit qeverisje a jemi në rrugë të drejtë apo jo”, shtoi Arjanit Hoxha.
Në të gjitha komunat që i pretendojnë seriozisht, Hoxha thotë se gara zhvillohet mes Besës dhe BDI-së, andaj shtoi se mund të ndodh që në disa komuna këto dy subjekte të përballen edhe në rrethin e dytë.